യാത്രക്കാര്ക്ക് ആശ്വാസമായി പൊതുശുചിമുറികള് കണ്ടെത്താന് 'ക്ലൂ' മൊബൈല് ആപ്പ്
തിരുവനന്തപുരം: യാത്രക്കാര് നേരിടുന്ന പ്രധാന പ്രശ്നങ്ങളിലൊന്നായ വൃത്തിയുള്ള പൊതുശുചിമുറികളുടെ അഭാവത്തിന് പരിഹാരവുമായി തദ്ദേശ സ്വയംഭരണ വകുപ്പിന്റെ മാലിന്യമുക്ത നവകേരളം പദ്ധതിയുടെ ഭാഗമായി ശുചിത്വ മിഷന് വികസിപ്പിച്ച 'ക്ലൂ' മൊബൈല് ആപ്പ്. മാസ്കറ്റ് ഹോട്ടലില് മന്ത്രി എം ബി രാജേഷ് ആപ്പ് പ്രകാശനം ചെയ്തു. ഉപയോക്താവിന്റെ നിലവിലെ ലൊക്കേഷനെ അടിസ്ഥാനമാക്കി സമീപത്തെ ശുചിമുറികള് ഗൂഗിള് മാപ്പിന്റെ സഹായത്തോടെ കണ്ടെത്താനാകുന്നതാണ് ആപ്പിന്റെ പ്രധാന സവിശേഷത. തദ്ദേശ സ്വയംഭരണ സ്ഥാപനങ്ങളുടെ കീഴിലുള്ള പൊതുശുചിമുറികള്ക്കൊപ്പം കേരള ഹോട്ടല് ആന്ഡ് റസ്റ്റാറന്റ് അസോസിയേഷനുമായി സഹകരിച്ച് ഉയര്ന്ന നിലവാരം പുലര്ത്തുന്ന സ്വകാര്യ ഹോട്ടലുകളിലെയും റസ്റ്റാറന്റുകളിലെയും ശുചിമുറികളും ശൃംഖലയില് ഉള്പ്പെടുത്തിയിട്ടുണ്ട്.
ഓരോ ശുചിമുറി കേന്ദ്രത്തിന്റെയും പ്രവര്ത്തന സമയം, പാര്ക്കിങ് സൗകര്യങ്ങള്, ഉപയോക്തൃ റേറ്റിങ്ങുകള് എന്നിവ തല്സമയം ആപ്പിലൂടെ ലഭ്യമാവും. ഫ്രൂഗല് സയന്റിഫിക് പ്രൈവറ്റ് ലിമിറ്റഡിന്റെ സാങ്കേതിക സഹകരണത്തോടെയാണ് 'ക്ലൂ' ആപ്പ് വികസിപ്പിച്ചിരിക്കുന്നത്. ആദ്യഘട്ടത്തില് സംസ്ഥാനത്തെ പ്രധാന വിനോദസഞ്ചാര പാതകളെയും ദേശീയ പാതകളെയും കേന്ദ്രീകരിച്ചാണ് പദ്ധതി നടപ്പാക്കുന്നത്. വരും മാസങ്ങളില് കൂടുതല് തദ്ദേശ സ്ഥാപനങ്ങളെയും സ്വകാര്യ പങ്കാളികളെയും ഉള്പ്പെടുത്തി പദ്ധതി കേരളത്തിലുടനീളം വ്യാപിപ്പിക്കുമെന്ന് അധികൃതര് അറിയിച്ചു.