സിഎഎ: ഹരജികളില് അന്തിമ വാദം കേള്ക്കല് മെയ് 5 ന് ആരംഭിക്കുമെന്ന് സുപ്രിം കോടതി
ന്യൂഡല്ഹി: 2019 ലെ പൗരത്വ ഭേദഗതി നിയമത്തിന്റെ (സിഎഎ) ഭരണഘടനാ സാധുതയെ ചോദ്യം ചെയ്യുന്ന 200 ലധികം ഹരജികളില് അന്തിമ വാദം കേള്ക്കല് മെയ് 5 ന് ആരംഭിക്കുമെന്ന് സുപ്രിംകോടതി. 2014 ഡിസംബര് 31-ന് മുമ്പ് ഇന്ത്യയിലെത്തിയ ഹിന്ദു, സിഖ്, ബുദ്ധ, ജൈന, ക്രിസ്ത്യന്, പാര്സി സമുദായങ്ങളില്പ്പെട്ട പാകിസ്താന്, ബംഗ്ലാദേശ്, അഫ്ഗാനിസ്ഥാന് എന്നിവിടങ്ങളില് നിന്നുള്ള കുടിയേറ്റക്കാര്ക്ക് ഇന്ത്യന് പൗരത്വം നല്കാന് സിഎഎ വ്യവസ്ഥ ചെയ്യുന്നു. മുസ്ലീം സമുദായത്തെ നിയമം ഒഴിവാക്കുന്നു. ഇത് ഭരണഘടനയുടെ ആര്ട്ടിക്കിള് 14, സമത്വത്തിനുള്ള അവകാശം എന്നിവ ലംഘിക്കുന്നുവെന്ന് പല നിയമ വിദഗ്ധരും പറയുന്നു. എന്നാല് പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്ര സര്ക്കാര് ഈ ആരോപണങ്ങള് നിരസിച്ചു.
ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചും ജസ്റ്റിസുമാരായ ജോയ്മല്യ ബാഗ്ചി, വിപുല് എം. പഞ്ചോളി എന്നിവരും ഉള്പ്പെട്ട ബെഞ്ച് വാദം കേള്ക്കല് പ്രക്രിയ സംബന്ധിച്ച് നിര്ദ്ദേശങ്ങള് പുറപ്പെടുവിച്ചു. ഹരജിക്കാരുടെ വാദങ്ങള് ഒന്നര ദിവസം കേള്ക്കുമെന്നും കേന്ദ്ര സര്ക്കാരിന് അവരുടെ ഭാഗം അവതരിപ്പിക്കാന് ഒരു ദിവസത്തെ സമയം നല്കുമെന്നും ബെഞ്ച് പറഞ്ഞു. മെയ് 12 നകം വാദം കേള്ക്കല് പൂര്ത്തിയാക്കുമെന്ന് കോടതി സൂചിപ്പിച്ചു.
നാല് ആഴ്ചയ്ക്കുള്ളില് എല്ലാ കക്ഷികളും അധിക രേഖകളും രേഖാമൂലമുള്ള വാദങ്ങളും സമര്പ്പിക്കണമെന്നും സുപ്രിംകോടതി നിര്ദ്ദേശിച്ചു.സിഎഎ രാജ്യവ്യാപകമായി നടപ്പിലാക്കുന്നതുമായി ബന്ധപ്പെട്ട വിഷയങ്ങള് ആദ്യം പരിഗണിക്കുമെന്നും തുടര്ന്ന് അസം, ത്രിപുര എന്നിവയുമായി ബന്ധപ്പെട്ട ഹരജികള് പരിഗണിക്കുമെന്നും കോടതി വ്യക്തമാക്കി.
അസമിലെ സ്ഥിതി മറ്റ് സംസ്ഥാനങ്ങളില് നിന്ന് വ്യത്യസ്തമാണെന്നും കോടതി ചൂണ്ടിക്കാട്ടി, കാരണം അവിടെ പൗരത്വത്തിനുള്ള കട്ട് ഓഫ് തീയതി മുമ്പ് 1971 മാര്ച്ച് 24 ആയിരുന്നു, സിഎഎ പ്രകാരം ഇത് 2014 ഡിസംബര് 31 വരെ നീട്ടിയിട്ടുണ്ട്. സിഎഎ നിയമങ്ങള് 2024 നടപ്പിലാക്കുന്നത് സ്റ്റേ ചെയ്യണമെന്ന് ആവശ്യപ്പെട്ടുള്ള ഇടക്കാല ഹരജികളില് കേന്ദ്ര സര്ക്കാരില് നിന്ന് മറുപടി തേടിയ 2024 മാര്ച്ച് 19 നാണ് കേസ് അവസാനമായി ലിസ്റ്റ് ചെയ്തത്. എന്നിരുന്നാലും, നിയമങ്ങള് നടപ്പിലാക്കുന്നത് സ്റ്റേ ചെയ്യാന് സുപ്രിംകോടതി വിസമ്മതിക്കുകയായിരുന്നു.