മോദിയെ നുഴഞ്ഞുകയറ്റക്കാരനെന്ന് വിശേഷിപ്പിച്ച മമതക്കെതിരേ വിമർശനവുമായി ബിജെപി

ന്യൂഡൽഹി : പ്രധാനമന്ത്രി നരേന്ദ്ര മോദിയെ നുഴഞ്ഞുകയറ്റക്കാരൻ എന്ന് വിശേഷിപ്പിച്ച പശ്ചിമ ബംഗാൾ മുഖ്യമന്ത്രി മമത ബാനർജിക്കെതിരെ ബിജെപി രംഗത്ത്. ഇത്തരമൊരു പരാമർശം നടത്തിയ മമതയ്ക്ക് മുഖ്യമന്ത്രി എന്ന ഭരണഘടനാപരമായ പദവിയിൽ തുടരാൻ അർഹതയില്ലെന്ന് ബിജെപി ആരോപിച്ചു.

മമതയുടെ പരാമർശം പരാജയഭീതിയിൽ നിന്നാണെന്ന് ബിജെപി നേതാവ് ശിശിർ ബജോരിയ പ്രതികരിച്ചു. കൊൽക്കത്തയിൽ നടന്ന പരിപാടിക്കിടെയാണ് മമത മോദിയെ നുഴഞ്ഞുകയറ്റക്കാരാനെന്ന് വിളിച്ചത്.

“മോദിജി, ഞങ്ങളുടെ അവകാശങ്ങൾ തട്ടിയെടുക്കാൻ ഞങ്ങൾ അനുവദിക്കില്ല. നിങ്ങൾ സൗദി അറേബ്യയിൽ പോയി കൈകൊടുക്കുന്നു, ദുബായിൽ കെട്ടിപ്പിടിക്കുന്നു. എന്നാൽ ഇന്ത്യയിലെത്തുമ്പോൾ പേരുകൾ മായ്ച്ചു കളയുന്നു. ഇവിടെയുള്ളവരെ നിങ്ങൾ നുഴഞ്ഞുകയറ്റക്കാർ എന്ന് വിളിക്കുന്നു. യഥാർത്ഥത്തിൽ നിങ്ങൾ തന്നെയാണ് ഏറ്റവും വലിയ നുഴഞ്ഞുകയറ്റക്കാരൻ,” എന്നായിരുന്നു മമതയുടെ പരാമർശം.