ഭാരത്ബന്ദ്: പൊതുസ്വത്ത് നശിപ്പിക്കുന്നവരെ കര്ശനമായി നേരിടാന് ഡിജിപിയുടെ നിര്ദേശം
തിരുവനന്തപുരം: അഗ്നിപഥ് പദ്ധതിക്കെതിരെയുള്ള പ്രക്ഷോഭങ്ങളുടെ ഭാഗമായി ഏതാനും സംഘടനകള് ഇന്ന് ഭാരത് ബന്ദ് പ്രഖ്യാപിച്ച സാഹചര്യത്തില് പൊതുജനങ്ങള്ക്കെതിരെയുള്ള അക്രമങ്ങളും പൊതുസ്വത്ത് നശിപ്പിക്കുന്നതും കര്ശനമായി നേരിടുമെന്ന് ഡിജിപി. അക്രമങ്ങള്ക്ക് മുതിരുന്നവരെയും വ്യാപാരസ്ഥാപനങ്ങള് നിര്ബന്ധപൂര്വ്വം അടപ്പിക്കുന്നവരെയും അറസ്റ്റ് ചെയ്ത് നിയമനടപടി സ്വീകരിക്കും. സംസ്ഥാനത്തെ മുഴുവന് പോലിസ് സേനയും മുഴുവന് സമയവും സേവനസന്നദ്ധരായിരിക്കാന് നിര്ദ്ദേശിച്ചിട്ടുണ്ട്.
കോടതികള്, വൈദ്യുതിബോര്ഡ് ഓഫിസുകള്, കെ.എസ്.ആര്.ടി.സി, മറ്റ് സര്ക്കാര് ഓഫിസുകള്, സ്ഥാപനങ്ങള് എന്നിവയ്ക്ക് ആവശ്യമായ പോലിസ് സംരക്ഷണം നല്കാന് ജില്ലാ പോലിസ് മേധാവിമാര് നടപടി സ്വീകരിക്കും. സര്വ്വീസ് നടത്തുന്ന സ്വകാര്യ ബസുകള്ക്ക് പോലിസ് സുരക്ഷ ഉറപ്പാക്കും. പ്രധാനപ്പെട്ട സ്ഥലങ്ങളില് ഞായാറാഴ്ച രാത്രി മുതല്തന്നെ പോലിസ് പിക്കറ്റിങും പട്രോളിങും ഏര്പ്പെടുത്തിയിട്ടുണ്ട്. ക്രമീകരണങ്ങളുടെ ഭാഗമായി ഇന്നലെ ജില്ലാ പോലിസ് മേധാവിമാരുടെ നേതൃത്വത്തില് റെയ്ഞ്ച് ഡി.ഐ.ജിമാരും മേഖലാ ഐ.ജിമാരും കൂടിയാലോചന നടത്തിയിരുന്നു.