ഗസയില് ആശുപത്രിക്ക് നേരെയുള്ള ആക്രമണം; അറബ് നേതാക്കള് ബൈഡനുമായുള്ള ചര്ച്ചയില് നിന്ന് പിന്മാറി
ഗസ: ഇസ്രായേലിന്റെ ഫലസ്തീന് ആക്രമണങ്ങളുടെ പശ്ചാത്തലത്തില് അമേരിക്കന് പ്രസിഡന്റ് ജോ ബൈഡന് അല്പസമയത്തിനകം ഇസ്രായേലില് എത്തും. ആശുപത്രി ആക്രമണത്തിന്റെ പശ്ചാത്തലത്തില് ബൈഡന്റെ സന്ദര്ശനം നിര്ണായകമാണ്. ഫലസ്തീന് പ്രസിഡന്റ് മഹമൂദ് അബ്ബാസ്, ജോര്ദാന് ഭരണാധികാരിയടക്കമുള്ള അറബ് നേതാക്കള് എന്നിവരെ ബൈഡന് കാണുമെന്ന് അറിയിച്ചിരുന്നു. എന്നാല് ആശുപത്രി ആക്രമണത്തിന്റെ പശ്ചാത്തലത്തില് അറബ് നേതാക്കള് ബൈഡനുമായുള്ള ചര്ച്ചയില് നിന്ന് പിന്മാറി.
ഫലസ്തീനില് ആശുപത്രിക്ക് നേരെയുണ്ടായ ആക്രമണത്തില് ശക്തമായി പ്രതികരിച്ച് അറബ് രാജ്യങ്ങള്. ആവര്ത്തിച്ചുള്ള അഭ്യര്ത്ഥനകള്ക്കൊടുവിലും വെടിനിര്ത്തലിന് തയാറാവാത്തതില് അതൃപ്തി പ്രകടിപ്പിച്ച സൗദി, അന്താരാഷ്ട്ര സമൂഹം ഇരട്ടത്താപ്പ് വെടിയണമെന്നാവശ്യപ്പെട്ടു. നിഷ്ഠൂരമായ കൂട്ടക്കൊലയെന്നാണ് ഖത്തര് ആക്രമണത്തെ വിശേഷിപ്പിച്ചത്. ഇത് പ്രകോപനം കൂട്ടുന്നതാണെന്നും ഖത്തര് മുന്നറിയിപ്പ് നല്കി.
അന്താരാഷ്ട്ര മനുഷ്യാവകാശ നിയമങ്ങള് ലംഘിക്കപ്പെടുന്നതിലും ഇത് തടയാന് ഇടപെടലുണ്ടാവാത്തതിലും രോഷം ശക്തമാണ്. അമേരിക്ക ഇടപെട്ട് നടത്തുന്ന സമാധാന ശ്രമങ്ങളിലെല്ലാം നിരപരാധികള് കൊല്ലപ്പെടുന്നത് ഒഴിവാക്കാനും, മരുന്നും സഹായങ്ങളുമെത്തിക്കാനുള്ള പാത തുറക്കാനുമായിരുന്നു സൗദിയും ഖത്തറും യുഎഇയും ഉള്പ്പടെ പ്രധാന രാജ്യങ്ങള് ആവശ്യപ്പെട്ടത്. ആക്രമണം നിഷ്ഠൂരമായ കൂട്ടക്കൊലയെന്ന് ഖത്തര് വിശേഷിപ്പിച്ചു. അന്താരാഷ്ട്ര നിയമങ്ങളുടെ ലംഘനമാണിത്. നിരപരാധികളെയും സ്കൂളുകളും ആശുപ്രത്രികളും ആക്രമിക്കുന്ന ഇസ്രായേല് നടപടി പ്രകോപനം കൂട്ടുന്നതാണെന്ന് ഖത്തര് വിദേശകാര്യ മന്ത്രാലയം മുന്നറിയിപ്പ് നല്കി. യുഎഇ ഉള്പ്പടെ പ്രധാന രാജ്യങ്ങളെല്ലാം ആക്രമണത്തെ അപലപിച്ചു. സംഘര്ഷം ഉടന് അവസാനിപ്പിക്കണമെന്നും യുഎഇ ആവശ്യപ്പെട്ടു. ഫലസ്തീന് 10 കോടി ഡോളര് അടിയന്തര സഹായം നല്കാന് ജിസിസി രാജ്യങ്ങളുടെ മന്ത്രിതല കൗണ്സില് തീരുമാനിച്ചു. സൈനിക നടപടി നിര്ത്തി വെയ്ക്കണമെന്ന ആവശ്യം ശക്തമാണ്.