എറണാകുളം ജംഗ്ഷന്, ടൗണ് സ്റ്റേഷനുകളില് ഒരുങ്ങുന്നത് 671 കോടിയുടെ വികസനപ്രവര്ത്തനങ്ങള്
കൊച്ചി: സംസ്ഥാനത്തെ തന്നെ ഏറ്റവും പ്രധാനപ്പെട്ട റെയില്വേ സ്റ്റേഷനുകളായ എറണാകുളം ജംഗ്ഷന്, എറണാകുളം ടൗണ് റെയില്വേ സ്റ്റേഷനുകളില് ഒരുങ്ങുന്നത് 671 കോടി രൂപയുടെ വികസന പ്രവര്ത്തനങ്ങള്. വിമാനത്താവളങ്ങളുടെ മാതൃകയിലുള്ള നവീകരണ പ്രവര്ത്തനങ്ങളാണ് രണ്ടിടത്തും ആവിഷ്കരിച്ചിട്ടുള്ളത്. സംസ്ഥാനത്ത് ആദ്യമായാണ് അത്യാധുനിക മാതൃകയില് റെയില്വേ സ്റ്റേഷനുകള് നവീകരിക്കുന്നത്. സിയാല് കണ്വെന്ഷന് സെന്ററില് നടന്ന ചടങ്ങില് പദ്ധതികളുടെ ശിലാസ്ഥാപന കര്മ്മം പ്രധാനമന്ത്രി നരേന്ദ്ര മോദി നിര്വഹിച്ചു.
എറണാകുളം ജംഗ്ഷന് സ്റ്റേഷനില് 445 കോടി രൂപയുടെയും ടൗണ് സ്റ്റേഷനില് 226 കോടി രൂപയുടെയും പദ്ധതികളാണ് വിഭാവനം ചെയ്തിട്ടുള്ളത്. ഇരു സ്റ്റേഷനുകളിലെയും കെട്ടിടങ്ങള് പൂര്ണമായും പൊളിച്ച് മാറ്റി ആധുനിക രീതിയില് പുതുക്കി നിര്മിക്കാനാണ് റെയില്വേയുടെ തീരുമാനം. ജംഗ്ഷന് സ്റ്റേഷനില് അഞ്ച് നിലകളിലും ടൗണ് സ്റ്റേഷനില് നാല് നിലകളിലുമുള്ള ഓഫീസ് കെട്ടിടങ്ങളാണ് നിര്മിക്കുന്നത്. പ്ലാറ്റ്ഫോമുകളില് മഴയും വെയിലുമേല്ക്കാത്ത രീതിയില് പൂര്ണമായും മൂടുന്ന തരത്തിലുള്ള കാത്തിരിപ്പ് കേന്ദ്രങ്ങളാണ് ഒരുക്കും. കാര് പാര്ക്കിംഗ് സൗകര്യങ്ങളുടെ അപര്യാപ്തത പരിഹരിക്കുന്നതിനായി പല നിലകളിലുള്ള പാര്ക്കിംഗ് കോംപ്ലക്സുകള് രണ്ട് സ്റ്റേഷനിലും നിര്മ്മിക്കുന്നുണ്ട്.
ജംഗ്ഷന് സ്റ്റേഷനില് നിലവിലുള്ള ഫുട് ഓവര് ബ്രിഡ്ജിന് പകരം അത്യാധുനിക മാതൃകയിലുള്ള രണ്ട് എയര് കോണ്കോഴ്സുകള് നിര്മ്മിക്കും. 25 മീറ്റര് വീതിയില് നിര്മിക്കുന്ന കോണ്കോഴ്സുകളില് യാത്രക്കാര്ക്ക് വിശ്രമിക്കാനുള്ള സൗകര്യങ്ങളുണ്ടാകും. ടൗണ് സ്റ്റേഷനില് 36 മീറ്റര് വീതിയിലുള്ള എയര് കോണ്കോഴ്സും 12 മീറ്റര് വീതിയില് ഫുട് ഓവര് ബ്രിഡ്ജുമാണ് നിര്മ്മിക്കുന്നത്. ജംഗ്ഷന് സ്റ്റേഷനെ കൊച്ചി മെട്രോയുടെ എറണാകുളം സൗത്ത് സ്റ്റേഷനിലേക്ക് ബന്ധിപ്പിക്കുന്ന 95 മീറ്റര് നീളമുള്ള ആകാശപാതയും റെയില്വേ വിഭാവനം ചെയ്തിട്ടുണ്ട്.
പാരമ്പര്യ ഊര്ജ സ്ത്രോതസുകളെ പരമാവധി ഉപയോഗിക്കുക എന്ന ലക്ഷ്യത്തോടെ സോളാര് വൈദ്യുതിക്ക് വേണ്ടിയുള്ള സംവിധാനങ്ങള് ഒരുക്കും. ജല ദൗര്ലഭ്യം പരിഹരിക്കുന്നതിനായി മഴവെള്ള സംഭരണികളും ജല ശുദ്ധീകരണ പ്ലാന്റുകളും നിര്മിക്കുന്നുണ്ട്. ഗതാഗതം സുഗമമാക്കുന്നതിനായി റോഡുകളുടെ വീതി കൂട്ടും. ഭിന്നശേഷി സൗഹൃദമായിട്ടായിരിക്കും സ്റ്റേഷനുകളുടെ പുനര്നിര്മാണം. ഇതിനോടൊപ്പം നവീകരിക്കുന്ന കൊല്ലം ജംഗ്ഷന് റെയില്വേ സ്റ്റേഷനിലും സമാന സൗകര്യങ്ങള് തന്നെയാകും ഒരുക്കുന്നത്.
ആത്മ നിര്ഭര് ഭാരത്, ഗതി ശക്തി ഭാരത് പദ്ധതികളുടെ ഭാഗമായാണ് നവീകരണ പ്രവര്ത്തനങ്ങള് നടത്തുന്നത്. ജംഗ്ഷന് സ്റ്റേഷന്റെ നിര്മാണ പ്രവര്ത്തനങ്ങള് 24 മാസം കൊണ്ടും ടൗണ് സ്റ്റേഷന് 36 മാസം കൊണ്ടും പൂര്ത്തിയാക്കാനാണ് റെയില്വേയുടെ ലക്ഷ്യം. ട്രയിന് സര്വീസുകളെ ബാധിക്കാതെയാകും നിര്മാണ പ്രവര്ത്തനങ്ങള് നടത്തുകയെന്ന് റെയില്വേ അധികൃതര് വ്യക്തമാക്കി.