ജനാര്‍ദന്‍ ദ്വിവേദി ആര്‍എസ്എസ് വേദിയില്‍; പങ്കെടുത്തതില്‍ തെറ്റില്ലെന്ന് കോണ്‍ഗ്രസ്
ഭഗവത്ഗീതയെ ആധാരമാക്കി ഡല്‍ഹിയില്‍ സംഘടിപ്പിച്ച പരിപാടിയിലാണ് ആര്‍എസ്എസ് ജനറല്‍ സെക്രട്ടറി മോഹന്‍ ഭാഗവതിനൊപ്പം ദ്വിവേദി വേദി പങ്കിട്ടത്.
ന്യൂഡല്‍ഹി: എഐസിസി മുന്‍ ജനറല്‍ സെക്രട്ടറി ജനാര്‍ദന്‍ ദ്വിവേദി ആര്‍എസ്എസ് വേദിയില്‍. ഭഗവത്ഗീതയെ ആധാരമാക്കി ഡല്‍ഹിയില്‍ സംഘടിപ്പിച്ച പരിപാടിയിലാണ് ആര്‍എസ്എസ് ജനറല്‍ സെക്രട്ടറി മോഹന്‍ ഭാഗവതിനൊപ്പം ദ്വിവേദി വേദി പങ്കിട്ടത്. കേന്ദ്രമന്ത്രി സ്മൃതി ഇറാനിയും സാധ്വി റിതംബരയും ചടങ്ങില്‍ സംബന്ധിച്ചിരുന്നു. ഔദ്യോഗിക ക്ഷണം ലഭിച്ചതിനാലാണ് പരിപാടിയില്‍ സംബന്ധിച്ചതെന്ന് ദ്വിവേദി പറഞ്ഞു. കോണ്‍ഗ്രസുമായി ഏറെ കാലമായി അകലം പാലിച്ച് വരികയാണ് ദ്വിവേദി.
അതേസമയം, ദ്വിവേദി ആര്‍എസ്എസ് പരിപാടിയില്‍ വേദി പങ്കിട്ടതില്‍ തെറ്റില്ലെന്ന് കോണ്‍ഗ്രസ് നേതാവ് പവന്‍ ഖേരി പറഞ്ഞു. പ്രത്യയശാസ്ത്ര പരമായല്ല. ഭഗവത് ഗീതയുമായി ബന്ധപ്പെട്ട പരിപാടിയായതിനാലാണ് അദ്ദേഹം പങ്കെടുത്തത്. മോഹന്‍ ഭാഗവതിനോ സംഘപരിവാര്‍ സംഘടനയ്‌ക്കോ ഭഗവത്ഗീതയുടെ കുത്തകാവകാശം ഇല്ലെന്നും പവന്‍ ഖേര പറഞ്ഞു.