22 നിരോധിത സിഗരറ്റ് പായ്ക്കറ്റുകള്‍ കണ്ടെടുത്തു; വില്‍പനക്കാരന്‍ പിടിയില്‍
പെരിന്തല്‍മണ്ണ: വില്‍പനയ്ക്കായെത്തിച്ച നിരോധിത സിഗരറ്റ് പായ്ക്കറ്റുകള്‍ കണ്ടെടുത്തു. നിരോധിത പുകയില ഉത്പന്നങ്ങള്‍ വില്‍പന നടത്തുന്നുണ്ടെന്ന രഹസ്യവിവരത്തിന്റെ അടിസ്ഥാനത്തില്‍ നഗരത്തില്‍ നടത്തിയ പരിശോധനയിലാണ് പെരിന്തല്‍മണ്ണ സ്റ്റേഡിയം കോംപ്ലക്‌സിലെ ഫോക്കസ് സ്‌റ്റേഷനറി കടയില്‍നിന്നും രണ്ട് ഇനത്തിലുള്ള 22 നിരോധിത സിഗരറ്റ് പാക്കറ്റുകള്‍ കണ്ടെത്തിയത്.
സംഭവത്തില്‍ കടയുടമ കൊണ്ടോട്ടി പുളിക്കല്‍ അന്തിയൂര്‍കുന്നിലെ പറമ്പില്‍ വീട്ടില്‍ ഉമ്മറി (55) നെതിരേ കേസെടുത്തു. പെരിന്തല്‍മണ്ണ ഇന്‍സ്‌പെക്ടര്‍ സുനില്‍ പുളിക്കല്‍, എസ്‌ഐ സി കെ നൗഷാദ് എന്നിവര്‍ നടത്തിയ പരിശോധനയിലാണ് കടയിലെ മേശയ്ക്ക് അടിയില്‍ രഹസ്യമായി ഒളിപ്പിച്ചുവച്ച നിലയില്‍ സിഗരറ്റ് കണ്ടെത്തിയത്. എഎസ്‌ഐ ഷാജി, സിപിഒ നിഖില്‍ എന്നിവരടങ്ങിയ സംഘമാണ് പരിശോധന നടത്തിയത്.