കോഴിക്കോട്: കരിപ്പൂര്‍ അന്താരാഷ്ട്ര വിമാനത്താവളം വഴി കടത്താന്‍ ശ്രമിച്ച ഏകദേശം 75 ലക്ഷം രൂപ വിലവരുന്ന 1.39 കിലോ സ്വര്‍ണം കോഴിക്കോട് കസ്റ്റംസ് പ്രിവന്റീവ് വിഭാഗം പിടികൂടി.
ഷാര്‍ജയില്‍നിന്ന് എയര്‍ ഇന്ത്യ എക്‌സ്പ്രസ് വിമാനത്തില്‍ കരിപ്പൂര്‍ വിമാനത്താവളത്തില്‍ വന്നിറങ്ങിയ കാസര്‍കോട് സ്വദേശിയായ ഷക്കീബ് അഹമ്മദില്‍നിന്നും 357 ഗ്രാം തൂക്കം വരുന്ന 24 തങ്ക കട്ടി ഡോര്‍ ലോക്കിനുള്ളില്‍ ഒളിപ്പിച്ച നിലയിലും ബഹ്‌റയ്‌നില്‍നിന്നും ഗള്‍ഫ് എയര്‍ വിമാനത്തില്‍ (GF262) വന്നിറങ്ങിയ കളത്തില്‍ അബ്ദുല്‍ ആദിലില്‍നിന്നും 1022 ഗ്രാം സ്വര്‍ണ മിശ്രിതം ശരീരത്തില്‍ സ്വകാര്യഭാഗത്ത് ഒളിപ്പിച്ച നിലയിലുമാണ് കണ്ടെത്തിയത്.
രഹസ്യവിവരത്തിന്റെ അടിസ്ഥാനത്തിലാണ് കോഴിക്കോട് കസ്റ്റംസ് പ്രിവന്റീവ് ഉദ്യോഗസ്ഥര്‍ എയര്‍പോര്‍ട്ടിലെത്തി യാത്രക്കാരെ പിടികൂടിയത്.