കൊല്ലത്ത് മന്ത്രവാദത്തിന്റെ പേരില് ഭാര്യയോട് ക്രൂരത, മുഖത്ത് തിളച്ച മീന്കറിയൊഴിച്ചു; ഭര്ത്താവിനെതിരേ കേസെടുത്ത് പോലിസ്
കൊല്ലം: ആയൂരില് മന്ത്രവാദത്തിന്റെ പേരില് ഭാര്യയോട് ക്രൂരത. മന്ത്രവാദത്തിന് തയ്യാറാവാത്തതിന്റെ വൈരാഗ്യത്തില് ഭാര്യയുടെ മുഖത്ത് ഭര്ത്താവ് തിളച്ച മീന്കറി ഒഴിച്ചു. 36 വയസുകാരിയായ റെജില ഗഫൂറിനാണ് പൊള്ളലേറ്റത്. ഇവരുടെ ഭര്ത്താവ് സജീറീനെതിരെ ചടമംഗലം പോലിസ് കേസെടുത്തിട്ടുണ്ട്. റെജിലയുടെ മൊഴിയുടെ അടിസ്ഥാനത്തിലാണ് ഇയാള്ക്കെതിരെ കേസെടുത്തിരിക്കുന്നത്.
ഇന്നലെ രാവിലെ 9 മണിയോടുകൂടിയായിരുന്നു സംഭവം. കഴിഞ്ഞ കുറച്ചു നാളുകളായി റെജിലയുടെ ദേഹത്ത് സാത്താന് കൂടിയിരിക്കുന്നു എന്ന് പറഞ്ഞ് അഞ്ചല് ഏറത്തുള്ള മന്ത്രവാദിയുടെ അടുത്ത് റെജിലയെ സജീര് കൊണ്ടുപോയിരുന്നു. ഇന്നലെ രാവിലെ മന്ത്ര വാദിയുടെ അടുത്ത് നിന്ന് ഭസ്മവും തകിടും കൊണ്ട് വന്നു. എന്നാല് കൂടോത്രം തനിക്ക് വേണ്ടെന്ന് പറഞ്ഞ് റജില എതിര്ത്തു. രണ്ടുപേരും തമ്മില് വഴക്കുണ്ടായി.
ഇതിന്റെ വൈരാഗ്യത്തിലാണ് അടുപ്പിലുണ്ടായിരുന്ന മീന് കറിയെടുത്ത് സജീര് റെജിലയുടെ മുഖത്തേക്ക് തട്ടിത്തെറിപ്പിച്ചത്. റെജിലയുടെ നിലവിളി കേട്ട് നാട്ടുകാരും ബന്ധുക്കളും ഓടിയെത്തി. റെജിലയെ ആദ്യം ആയൂരിലെ സ്വകാര്യ ആശുപത്രിയിലും പിന്നീട് അഞ്ചലിലെ സ്വകാര്യ ആശുപത്രിയിലും പ്രവേശിപ്പിച്ചു. റെജിലയുടെ മുഖത്തും ദേഹത്തും പൊള്ളലേറ്റിട്ടുണ്ട്.