സാഹിത്യകാരൻ യുഎ ഖാദര് അന്തരിച്ചു
കേരളീയനായ പിതാവ് മൊയ്തീന് കുട്ടി ഹാജിയുടേയും മ്യാന്മാര് സ്വദേശിനിയായ മാമൈദിയുടേയും മകനായി 1935ല് കിഴക്കന് മ്യാന്മാറിലെ ബില്ലിന് എന്ന ഗ്രാമത്തില് ജനിച്ച യുഎ ഖാദര് രണ്ടാം ലോകമഹായുദ്ധകാലത്ത് കേരളത്തിലെത്തി.
കോഴിക്കോട്: നോവലിസ്റ്റും ചെറുകഥാകൃത്തുമായ യുഎ ഖാദര് അന്തരിച്ചു. കോഴികോട് സ്വകാര്യ ആശുപത്രിയിലായിരുന്നു അന്ത്യം. 1935 ല് ബര്മ്മയില് ജനിച്ചു. കേരള സാഹിത്യ അക്കാദമി, കേരള ലളിതകലാ അക്കാദമി എന്നിവയില് അംഗവും സാഹിത്യ പ്രവര്ത്തക സഹകരണസംഘം വൈസ് പ്രസിഡന്റുമായിരുന്നു.
കേരളീയനായ പിതാവ് മൊയ്തീന് കുട്ടി ഹാജിയുടേയും മ്യാന്മാര് സ്വദേശിനിയായ മാമൈദിയുടേയും മകനായി 1935ല് കിഴക്കന് മ്യാന്മാറിലെ ബില്ലിന് എന്ന ഗ്രാമത്തില് ജനിച്ച യുഎ ഖാദര് രണ്ടാം ലോകമഹായുദ്ധകാലത്ത് കേരളത്തിലെത്തി. കൊയിലാണ്ടി ഗവ: ഹൈസ്കൂളിലെ പഠനത്തിന് ശേഷം മദ്രാസ് കോളേജ് ഓഫ് ആര്ട്സില് ചിത്ര കലാപഠനം നടത്തി. ആകാശവാണി കോഴിക്കോട് നിലയത്തിലും മെഡിക്കല് കോളജ് ഇന്സ്റ്റിറ്റ്യൂട്ട് ഓഫ് മെറ്റേണല് ആന്ഡ് ചൈല്ഡ് ഹെല്ത്തിലും ഗവണ്മെന്റ് ജനറല് ആശുപത്രിയിലും ജോലി ചെയ്ത ഖാദര് 1990-ലാണ് സര്ക്കാര് സര്വീസില്നിന്ന് വിരമിച്ചത്.
ഏഴ് പതിറ്റാണ്ടോളം നോവലിസ്റ്റും ചെറുകഥാകൃത്തും ചിത്രകാരനുമായി മലയാളത്തിൽ നിറഞ്ഞു നിന്ന വ്യക്തിത്വമായിരുന്നു യുഎ ഖാദര്. നോവലുകള്, കഥാസമാഹാരങ്ങള്, ലേഖനങ്ങള്, യാത്രാവിവരണം, ബാലസാഹിത്യം എന്നീ വിഭാഗങ്ങളിലായി എഴുപതോളം കൃതികളുടെ കര്ത്താവായ ഖാദറിന്റെ 'തൃക്കോട്ടൂര് പെരുമ' മലയാളഭാഷയിലുണ്ടായ ദേശപുരാവൃത്തരചനകളില് പ്രധാനപ്പെട്ടതാണ്. കൃഷ്ണമണിയിലെ തീനാളം, അഘോരശിവം, വായേ പാതാളം, കലശം, ഖുറൈശിക്കൂട്ടം, പൂമരത്തളിരുകള് എന്നിവയാണ് പ്രധാനരചനകള്.
ഇംഗ്ലീഷ്, ഹിന്ദി, കന്നട, തമിഴ് ഭാഷകളില് കഥകള് വിവര്ത്തനം ചെയ്തിട്ടുണ്ട്. കേരള സാഹിത്യ അക്കാദമി, കേരള ലളിതകലാ അക്കാദമി എന്നിവയില് അംഗവും സാഹിത്യ പ്രവര്ത്തക സഹകരണസംഘം വൈസ് പ്രസിഡന്റുമായിരുന്നു. 'തൃക്കോട്ടൂര് പെരുമ'യ്ക്ക് 1983ലെ കേരള സാഹിത്യ അക്കാദമി അവാര്ഡും തൃക്കോട്ടൂര് നോവലുകള്ക്ക് 2009ലെ കേന്ദ്രസാഹിത്യ അക്കാദമി പുരസ്കാരവും ലഭിച്ചു. എസ്കെ പൊറ്റെക്കാട്ട് അവാര്ഡ്, പത്മപ്രഭാ പുരസ്കാരം, അബുദാബി ശക്തി അവാര്ഡ്, സി എച്ച് മുഹമ്മദ് കോയ സാഹിത്യ അവാര്ഡ് എന്നിവ ലഭിച്ചു.