ചികില്സാ പിഴവ്: കോഴിക്കോട് മെഡിക്കല് കോളജില് ശസ്ത്രക്രിയക്ക് വിധേയനായ രോഗി മരിച്ചു
പിത്താശയക്കല്ല് നീക്കം ചെയ്യാന് ശസ്ത്രക്രിയയ്ക്ക് വിധേയനായ ആളാണ് മരിച്ചത്. ചികില്സാ പിഴവുണ്ടായെന്ന് കാണിച്ച് ചികില്സാ രേഖകള് അടക്കം ഡോക്ടമാര്ക്കതിരേ ആരോഗ്യവകുപ്പിനും മുഖ്യമന്ത്രിക്കും ബന്ധുക്കള് നേരത്തേ പരാതി നല്കിയിരുന്നു.
കോഴിക്കോട്: കോഴിക്കോട് മെഡിക്കല് കോളജ് ആശുപത്രിയില് ശസ്ത്രക്രിയയ്ക്ക് വിധേയനായ രോഗി മരിച്ചു. ചികില്സയിലുണ്ടായ പിഴവാണ് മരണകാരണമെന്ന് ചൂണ്ടിക്കാട്ടി രോഗിയുടെ ബന്ധുക്കള് പരാതി നല്കി. പിത്താശയക്കല്ല് നീക്കം ചെയ്യാന് ശസ്ത്രക്രിയയ്ക്ക് വിധേയനായ ആളാണ് മരിച്ചത്. ചികില്സാ പിഴവുണ്ടായെന്ന് കാണിച്ച് ചികില്സാ രേഖകള് അടക്കം ഡോക്ടമാര്ക്കതിരേ ആരോഗ്യവകുപ്പിനും മുഖ്യമന്ത്രിക്കും ബന്ധുക്കള് നേരത്തേ പരാതി നല്കിയിരുന്നു.
കഴിഞ്ഞ ഏപ്രില് 13നാണ് ചേമഞ്ചേരി സ്വദേശി ബൈജുവിന് പിത്താശയത്തിലെ കല്ല് നീക്കം ചെയ്യാന് ശസ്ത്രക്രിയക്ക് വിധേയനായത്.
താക്കോല് ദ്വാര സര്ജറിയിലൂടെയാണ് കല്ല് നീക്കം ചെയ്തത്. രണ്ട് ദിവസം കഴിഞ്ഞാല് ആശുപത്രി വിടാമെന്നും ഡോക്ടര്മാര് അറിയിച്ചിരുന്നു. എന്നാല് ഒരാഴ്ചയ്ക്കകം രോഗി ഗുരുതരാവസ്ഥയിലായി. ശസ്ത്രക്രിയയ്ക്ക് ശേഷം പിത്താശയത്തിലെ നീര് പുറത്തുപോകാന് ട്യൂബ് ഇടണം. എന്നാല് ഈ ട്യൂബ് ഇട്ടില്ലെന്നാണ് ബന്ധുക്കള് പറയുന്നത്.
തീവ്ര പരിചരണ വിഭാഗത്തില് ചികില്സയില് പ്രവേശിപ്പിച്ച രോഗിയെ രണ്ട് തവണ ഡയാലിസിസിന് വിധേയരാക്കിയിരുന്നു. കൂടുതല് പരിശോധന നടത്താന് സ്വകാര്യ ആശുപത്രിയില് കൊണ്ടുപോകാനും മെഡിക്കല് കോളേജിലെ ഡോക്ടര്മാര് എഴുതി നല്കിയിരുന്നു. എന്നാല് ചികില്സാ പിഴവ് ഉണ്ടായിട്ടില്ലെന്നാണ് മെഡിക്കല് കോളജ് സൂപ്രണ്ടിന്റെ വാദം.