നിരീക്ഷണത്തിലിരിക്കെ മരിച്ച മലപ്പുറം വണ്ടൂര്‍ സ്വദേശിക്ക് കൊവിഡ് സ്ഥിരീകരിച്ചു
മലപ്പുറം: കൊവിഡ് നിരീക്ഷണത്തിലിരിക്കെ മരണപ്പെട്ട മലപ്പുറം വണ്ടൂര്‍ സ്വദേശിക്ക് കൊവിഡ് സ്ഥിരീകരിച്ചു. വണ്ടൂര്‍ ചോക്കോട് സ്വദേശി മുഹമ്മദി(82)ന്റെ സ്രവപരിശോധനാ ഫലം പുറത്തുവന്നപ്പോഴാണ് കൊവിഡ് സ്ഥിരീകരിച്ചത്. ഇക്കഴിഞ്ഞ ജൂണ്‍ 29ന് റിയാദില്‍ നിന്നെത്തി നിരീക്ഷണത്തില്‍ കഴിയുകയായിരുന്നു. അര്‍ബുദത്തിനു ചികില്‍സയിലായിരുന്ന ഇദ്ദേഹത്തെ പനി കാരണം ജൂലൈ ഒന്നിന് മഞ്ചേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. മൂന്നിന് തീവ്രപരിചരണ വിഭാഗത്തിലേക്കു മാറ്റിയ മുഹമ്മദ് ഇന്നലെ രാത്രിയാണ് മരണപ്പെട്ടത്. ഇന്നു രാവിലെ 10.30ഓടെയാണ് കൊവിഡ് സ്ഥിരീകരിച്ചത്.സംസ്ഥാനത്ത് കൊവിഡ് രോഗബാധിതരുടെ എണ്ണവും ക്രമാതീതമായി വര്‍ധിക്കുകയാണ്. മരണപ്പെട്ടയാളുമായി സമ്പര്‍ക്കത്തിലേര്‍പ്പെട്ടവരെ നിരീക്ഷണത്തിലാക്കുമെന്ന് ജില്ലാ ഭരണകൂടം അറിയിച്ചു. ഇതോടെ സംസ്ഥാനത്ത് കൊവിഡ് ബാധിച്ച് മരിച്ചവരുടെ എണ്ണം 26 ആയി ഉയര്‍ന്നു.