|    Oct 20 Sat, 2018 2:47 pm
FLASH NEWS

അരിമണികള്‍ പറയുവാനൊരുങ്ങുന്നത് (കവിത)

Published : 26th February 2018 | Posted By: mi.ptk

സുഫീറ എരമംഗലം

കവിത

അരിമണികള്‍ പറയുവാനൊരുങ്ങുന്നത്

അവന്‍ വിശന്നവന്‍
അന്നം തേടിയലഞ്ഞവന്‍
അതുമാത്രം വേദാന്ത ചിന്തകളാക്കിയവന്‍.
ഒടുക്കം തന്റെ ‘ദൈവത്തെ’ കണ്ടുമുട്ടി.
ഏമാന്മാര്‍ താഴിട്ടു പൂജിക്കുവാനാഞ്ഞ
തുലാഭാരമായിരുന്നിരിക്കാം

അവഗണനയുടെ മാറാപ്പു ധാരി
വര്‍ണബോധത്തിന്‍ വിഴുപ്പു പേറുന്നവന്‍
അധമബോധം അനന്തരം കിട്ടിയോന്‍
ദീനവിലാപം പോലും സ്വന്തമില്ലാത്തവന്‍

നിറഞ്ഞാലും നിറയാത്ത
വയറാളുകള്‍ വന്ന്
പച്ചവിശപ്പിനെ
കൊന്നു തിന്നു
ഉറഞ്ഞ രക്തത്തിന്റെ
രുചി കുടിച്ചു.
അവന്റെ വിലാപരൂപത്തിനു മേല്‍
ചവിട്ടി നിന്ന് മേലാളബോധം ഏമ്പക്കമിട്ടു
എച്ചില്‍തൊലിയെന്ന്
കാര്‍ക്കിച്ചു തുപ്പി.
സെല്‍ഫിക്കോലിനാല്‍
പല്ലിട കുത്തി.
അപ്പോഴും തികട്ടി വരുന്നവയെ
പെപ്‌സി കുടിച്ചു ദഹനമാക്കി.
പാഴ്ജന്മം പോലും സ്വന്തമില്ലാത്തവന്‍ ജാതി മറന്നു വിശന്നതു തെറ്റ്.

ഉദരഭരിതരുടെ അജീര്‍ണ ജയ കാലം
മധുമാര്‍ക്ക് സൗജന്യ മരണം ഭക്ഷണമായ് കിട്ടുന്ന
അശ്ലീല സെല്‍ഫി കാലം
(അട്ടപ്പാടിയില്‍ മര്‍ദനമേറ്റു മരിച്ച ആദിവാസിയുവാവ് മധുവിന്)

                                                                           
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss