തോട്ടംതൊഴിലാളികളുടെ റോഡ് ഉപരോധ സമരം തുടരുന്നു

മേപ്പാടി: തോട്ടംതൊഴിലാളി പണിമുടക്കിന്റെ ഭാഗമായി ജില്ലയില്‍ വിവിധയിടങ്ങളില്‍ റോഡ് ഉപരോധിച്ചു. അരപ്പറ്റ, നെടുംബാല, ഓടത്തോട്, പൊഴുതന, വൈത്തിരി എന്നിവിടങ്ങളിലാണ് റോഡ് ഉപരോധിച്ചത്. അരപ്പറ്റയില്‍ രാവിലെ ഒമ്പതിന് സമരം ആരംഭിച്ചു. നൂറുകണക്കിന് സ്ത്രീത്തൊഴിലാളികള്‍ പങ്കെടുത്തു. കഴിഞ്ഞ നാലു ദിവസമായി ഉപരോധം തുടരുന്നതിനാല്‍ കല്‍പ്പറ്റ-വടുവന്‍ചാല്‍ റൂട്ടില്‍ സ്വകാര്യ ബസ്സുകളും ഇന്നലെ പണിമുടക്കി. ചുണ്ടേലിലും ഓടത്തോടും സംയുക്ത ട്രേഡ് യൂനിയന്റെ നേതൃത്വത്തിലാണ് റോഡ് ഉപരോധിച്ചത്. രാവിലെ ഒമ്പതിന് ആരംഭിച്ച ഉപരോധം 11ന് അവസാനിച്ചു. ചൂരല്‍മലയില്‍ ഹാരിസണ്‍സ് മലയാളം കമ്പനി അധികൃതരുടെ കോലം കത്തിച്ചായിരുന്നു തൊഴിലാളികളുടെ പ്രതിഷേധം.