കാഞ്ഞങ്ങാട് റെയില്‍വേ സ്‌റ്റേഷനില്‍ അടിസ്ഥാന സൗകര്യങ്ങള്‍ വര്‍ധിപ്പിക്കും

കാഞ്ഞങ്ങാട്: റെയില്‍വേ സ്‌റ്റേഷനില്‍ അടിസ്ഥാന സൗകര്യങ്ങള്‍ വര്‍ധിപ്പിക്കാന്‍ റെയില്‍വേ പാലക്കാട് ഡിവിഷന്‍ അസി. മാനേജര്‍ മോഹന്‍ എ മേനോന്റെയും പി കരുണാകരന്‍ എംപിയുടെയും നേതൃത്വത്തില്‍ നടന്ന ഉന്നത തല യോഗത്തില്‍ തീരുമാനമായി. റെയില്‍വേ സ്‌റ്റേഷനിലെ മൂന്ന് പ്ലാറ്റ് ഫോമുകള്‍ക്കും ആവശ്യമായ മേല്‍ക്കൂര പണിയാന്‍ നടപടിയെടുക്കും. പ്ലാറ്റ്‌ഫോമുകളില്‍ അടര്‍ന്ന് പോയ സിമന്റ് പലകകള്‍ മാറ്റി സ്ഥാപിക്കാനും നടപടി സ്വീകരിക്കും.
റെയില്‍വേസ്‌റ്റേഷന്റെ തെക്കുഭാഗത്ത് എകെജി ക്ലബ്ബിന് മുന്‍വശത്ത് കൂടെ യാത്രക്കാര്‍ക്ക് പ്ലാറ്റ്‌ഫോമില്‍ കടക്കാതെയുള്ള നടപ്പാലം പണിയണമെന്ന ആവശ്യം എംപി, എംഎല്‍എ ഫണ്ടുകളില്‍ നിന്നുള്‍പ്പെടെ പണം ലഭിക്കുകയാണെങ്കില്‍ റെയില്‍വേ മേല്‍നോട്ടത്തില്‍ നിര്‍മിച്ച് നല്‍കാന്‍ റെയില്‍വേ സന്നദ്ധമാകും. റെയില്‍വേസ്‌റ്റേഷന്റെ പടിഞ്ഞാറ് ഭാഗത്തെ യതീംഖാനയുടെ മുമ്പിലുള്ള റോഡ് ഒരറ്റത്തേക്ക് മാറ്റാന്‍ നഗരസഭ പണം മുടക്കിയാല്‍ റെയില്‍വേ സന്നദ്ധമാകുമെന്ന് എഡിആര്‍എം അറിയിച്ചു.
സ്‌റ്റേഷന്റെ കിഴക്ക് ഭാഗത്ത് അരിമല ഹോസ്പിറ്റലിന് മുന്നിലൂടെയുള്ള റോഡ് നഗരസഭ റോഡുമായി ബന്ധിപ്പിക്കുന്നതിന് ഇപ്പോഴുള്ള തടസ്സം നീക്കുന്ന കാര്യം പരിഗണിക്കും. സ്‌റ്റേഷന്റെ വടക്ക്ഭാഗത്തെ റെയില്‍വേ സ്‌റ്റേഷന്‍ റോഡില്‍ മാലിന്യം കെട്ടി നില്‍ക്കുന്ന റെയില്‍വേ സ്ഥലം പൂര്‍ണ്ണമായും നികത്തി വാഹന പാര്‍ക്കിങ് സൗകര്യം വിപുലപ്പെടുത്താന്‍ നടപടി സ്വീകരിക്കും.
നഗരസഭ ചെയര്‍മാന്‍ വി വി രമേശന്‍ അദ്ധ്യക്ഷത വഹിച്ചു. വൈസ് ചെയര്‍പേഴ്‌സണ്‍ എല്‍ സുലൈഖ, ഡിവിഷണല്‍ കൊമേഴ്‌സ്യല്‍ മാനേജര്‍ മധുക്കര്‍, എഡിഎന്‍ ഏഴിലന്‍, ഡിവിഷണല്‍ എന്‍ജിനീയര്‍ അരുണ്‍, ചീഫ് കൊമേഴ്‌സ്യല്‍ ഇന്‍സ്‌പെക്ടര്‍ ബാബുരാജ്, ട്രാഫിക് ഇന്‍സ്‌പെക്ടര്‍ വല്‍സന്‍ കുനിയില്‍, കാഞ്ഞങ്ങാട് സ്‌റ്റേഷന്‍ സൂപ്രണ്ട് ജയരാജ് മേനോന്‍, നഗരവികസന സമിതി ചെയര്‍മാന്‍ അഡ്വ.പി അപ്പുക്കുട്ടന്‍, ജനറല്‍ കണ്‍വീനര്‍ സി യൂസഫ്ഹാജി, പാസഞ്ചേഴ്‌സ് അസോസിയേഷന്‍ പ്രസിഡന്റ് ടി മുഹമ്മദ് അസ്‌ലം, റോട്ടറി ക്ലബ്ബ് പ്രസിഡന്റ് എം വിനോദ്, എന്‍ജിനീയര്‍ എം എസ് പ്രദീപ്, നഗരസഭ ആരോഗ്യ സ്റ്റാന്റിങ് കമ്മിറ്റി ചെയര്‍മാന്‍ എം പി ജാഫര്‍, എം ഹമീദ്ഹാജി തെക്കേപ്പുറം സംബന്ധിച്ചു.