വാമനപുരം നദിയില് നീരൊഴുക്ക് കുറവ്; കുടിവെള്ള പദ്ധതികള് ആശങ്കയില്
BY kasim kzm6 Jan 2018 4:16 AM GMT
kasim kzm6 Jan 2018 4:16 AM GMT
തിരുവനന്തപുരം: വാമനപുരം നദിയില് നീരൊഴുക്ക് കുറഞ്ഞതോടെ കുടിവെള്ള പദ്ധതികള് ആശങ്കയില്. ചിറയിന്കീഴ്, വര്ക്കല, കഴക്കൂട്ടം, നെടുമങ്ങാട് മേഖലകളിലെ നിരവധി പദ്ധതികളിലേക്കുള്ള പമ്പുകളാണ് വാമനപുരം നദിയിലെ പരവൂര്പ്പുഴക്കടവില് പ്രവര്ത്തിക്കുന്നത്. നീരൊഴുക്ക് കുറയുന്നതിനാല് വേനല്ക്കാലത്തെ ജലവിതരണം തകിടംമറിയുമെന്നാണ് വാട്ടര്അതോറിട്ടി ഉദ്യോഗസ്ഥര് പറയുന്നത്. കഴിഞ്ഞ വേനലില് നദിയുടെ ഉത്ഭവസ്ഥാനം മുതല് ചിറയിന്കീഴ് മുതലപ്പൊഴിവരെ വറ്റിവരണ്ടിരുന്നു. നദികളിലെ വിവിധ ഭാഗങ്ങളിലെ കുഴികളില് ജലം കെട്ടിനിന്നതാണ് പദ്ധതികള്ക്ക് ആശ്വാസമായത്. ചെറിയ പമ്പ് സെറ്റുകള് വച്ച് വെള്ളം പമ്പ് ചെയ്ത് ജലസംഭരണികളില് എത്തിച്ചതോടെയാണ് ജലവിതരണം അല്പമെങ്കിലും പുനസ്ഥാപിക്കാന് കഴിഞ്ഞത്. ലക്ഷക്കണക്കിന് രൂപ ഇതിനായി വാട്ടര് അതോറിറ്റിക്ക് ചെലവായി. അതോടൊപ്പം പൂവന്പാറ പാലത്തിന് താഴെ തടയണ നിര്മ്മിക്കുകയും ചെയ്തു. കഴിഞ്ഞ വേനലിനുശേഷം തുടര്ച്ചയായി മഴ ലഭിച്ചതിനാല് നദി നിറഞ്ഞൊഴുകുകയായിരുന്നു. എന്നാല്, നിലവില് ജലനിരപ്പ് മുക്കാല് ഭാഗവും താഴ്ന്നിരിക്കുകയാണ്. നദിക്ക് സമീപത്തെ കിണറുകളിലും ജലനിരപ്പ് കുറഞ്ഞു. കുടിവെള്ള വിതരണം മുടങ്ങാതിരിക്കാന് പദ്ധതി പ്രദേശത്തിന് മുമ്പിലും ശേഷവും തടയണ നിര്മ്മിക്കണമെന്ന ആവശ്യം പലതവണ ഉയര്ന്നെങ്കിലും യാതൊരു ഫലവുമുണ്ടായില്ല. ചിറയിന്കീഴ്, വര്ക്കല താലൂക്കുകളിലെ ബഹുഭൂരിപക്ഷം സ്ഥലങ്ങളിലേക്കും വെള്ളമെത്തിക്കുന്നത് ജലവിഭവ വകുപ്പിന്റെ ആറ്റിങ്ങല് ഡിവിഷന് ഓഫീസിന്റെ നേതൃത്വത്തിലാണ്. ഇതിലേക്കായി 11 പദ്ധതികളാണ് നടപ്പാക്കിയിട്ടുളളത്. എല്ലാം വാമനപുരം നദിയില് തന്നെയാണ് പ്രവര്ത്തിക്കുന്നത്. പദ്ധതികള് ഫലപ്രദമായി പ്രവര്ത്തിക്കുന്നു എന്ന് ഉറപ്പാക്കാന് അധികൃതര് ഇടപെടണമെന്നാണ് ജനങ്ങളുടെ ആവശ്യം.
Next Story
RELATED STORIES
അമേരിക്കയിൽ ഇലക്ട്രിക് കാർ മരത്തിലിടിച്ച് കത്തി മലയാളി കുടുംബത്തിലെ...
26 April 2024 7:59 PM GMTഎന്ഡ് ടു എന്ഡ് എന്ക്രിപ്ഷന് എടുത്തുമാറ്റാന് ആവശ്യപ്പെട്ടാല്...
26 April 2024 3:10 PM GMTകേരളത്തില് കള്ളവോട്ട് പരാതി വ്യാപകം; പത്തനംതിട്ട മണ്ഡലത്തില് ഏഴ്...
26 April 2024 3:01 PM GMTപലയിടത്തും രാത്രിയിലും നീണ്ടനിര; പോളിങ് ശതമാനം 70.03 പിന്നിട്ടു
26 April 2024 2:48 PM GMTകല്പറ്റയില് പിക്കപ്പിലേക്ക് ലോറി ഇടിച്ചുകയറി യുവാവ് മരിച്ചു
26 April 2024 2:25 PM GMTനീറ്റ് പരീക്ഷ മാര്ഗ നിര്ദേശക ക്ലാസ് 29ന്
26 April 2024 12:45 PM GMT