രഘുറാം രാജന്‍ എഎപി സീറ്റില്‍ രാജ്യസഭയിലേക്ക്?

ന്യൂഡല്‍ഹി:  ആര്‍ബിഐ മുന്‍ ഗവര്‍ണര്‍ രഘുറാം രാജനെ രാജ്യസഭയിലെത്തിക്കാന്‍ ആംആദ്മി പാര്‍ട്ടി നീക്കം നടത്തുന്നതായി റിപ്പോര്‍ട്ട്. കേന്ദ്ര സര്‍ക്കാരിന്റെ നോട്ട് നിരോധനത്തെ എതിര്‍ത്തതിനെ തുടര്‍ന്ന് സ്ഥാനമൊഴിയേണ്ടി വന്ന രഘുറാം രാജനെ രാജ്യസഭയിലേക്ക് മത്സരിപ്പിക്കാന്‍ എഎപി ശ്രമം നടത്തുന്നതായി ദേശീയ മാധ്യമങ്ങളാണ് റിപ്പോര്‍ട്ട് ചെയ്തത്. എന്നാല്‍, ഇക്കാര്യത്തില്‍ ഇതുവരെ ഔദ്യോഗിക സ്ഥിരീകരണം വന്നിട്ടില്ല.  ഡല്‍ഹിയിലെ മൂന്നു സീറ്റുകളിലൊന്നില്‍ രഘുറാം രാജനെ മത്സരിപ്പിക്കാന്‍ ശ്രമം നടത്തുന്നതായാണ് റിപ്പോര്‍ട്ട്.
വരുന്ന ജനുവരിയില്‍ രാജ്യസഭയിലേക്ക് നടക്കുന്ന തിരഞ്ഞെടുപ്പില്‍ മൂന്ന് സീറ്റിലും പാര്‍ട്ടിക്കാരല്ലാത്ത, രാഷ്ട്രീയക്കാരല്ലാത്ത, വ്യത്യസ്ത മേഖലകളില്‍ പ്രാഗല്‍ഭ്യം തെളിയിച്ചവരെ നിര്‍ത്താനാണു അരവിന്ദ് കെജ്‌രിവാളിന്റെ നീക്കമെന്നും റിപ്പോര്‍ട്ടില്‍ പറയുന്നു. എഎപിയുടെ പുതിയ നീക്കം 2019ലെ പൊതു തിരഞ്ഞെടുപ്പില്‍ ഗുണകരമാകുമെന്നും വിലയിരുത്തപ്പെടുന്നു.