പെണ്‍കുട്ടിയെ തട്ടിക്കൊണ്ട് പോകാന്‍ ശ്രമം

ആലുവ: തായിക്കാട്ടുകരയില്‍ പെണ്‍കുട്ടിയെ തട്ടിക്കൊണ്ടുപോകാന്‍ ശ്രമം. കുന്നത്തേരി ദാറുസലാം റോഡില്‍ ഇന്നലെ ഉച്ചയ്ക്ക് 12.30 നും ഒരുമണിക്കും ഇടയിലാണ് സംഭവം. ജുമുഅ നമസ്‌കാരത്തിന്റെ സമയമായതിനാല്‍ ഈ പ്രദേശത്ത് ഈ സമയം ആരും ഉണ്ടായിരുന്നില്ല. ഓമ്‌നി വാന്‍ പോലെ സൈഡ് ഡോറുള്ള വാഹനത്തില്‍ എത്തിയവരാണ്  തന്നെ തട്ടികൊണ്ടുപോവാന്‍ ശ്രമിച്ചതെന്നാണ് കുട്ടി പറയുന്നത്. സമീപത്തെ ഹെല്‍ത്ത് സെന്ററില്‍ പോയി മടങ്ങുകയായിരുന്ന കുട്ടിയുടെ അടുത്തേക്ക് വാന്‍ ഓടിച്ചെത്തിയവര്‍ പിടികൂടി വാനിലേക്ക് കയറ്റാനാണ്  ശ്രമിച്ചത്. കുട്ടി കുതറി മാറി കരഞ്ഞുകൊണ്ട് ഓടി രക്ഷപ്പെട്ടതിനെ തുടര്‍ന്ന് കാര്‍ പോവുകയായിരുന്നു. ദാറുസലാം തണ്ടിരിക്കല്‍ റോഡിലൂടെ വാന്‍ കടന്നുകളഞ്ഞതായാണ് നാട്ടുകാര്‍ സംശയിക്കുന്നത്. കുട്ടിയുടെ വീടിന്റെ ജനല്‍ ചില്ലില്‍ കഴിഞ്ഞ ദിവസം കറുത്ത സ്റ്റിക്കര്‍ പതിച്ചിരുന്നു. എന്നാല്‍, വീട്ടുകാര്‍ ഇത് കാര്യമാക്കിയിരുന്നില്ല. വിവരമറിഞ്ഞ് ആലുവ ഈസ്റ്റ്  എസ്‌ഐ എം എസ് ഫൈസല്‍ സംഭവ സ്ഥലത്തെത്തി പരിശോധന നടത്തി.