പയ്യന്നൂരില്‍ 8 വെന്റഡ് ക്രോസ് ബാറുകള്‍ നിര്‍മിക്കാന്‍ ഭരണാനുമതി

പയ്യന്നൂര്‍: കാര്‍ഷിക മേഖലയായ പയ്യന്നൂര്‍ മണ്ഡലത്തിലെ വിവിധ പഞ്ചായത്തുകളില്‍ വെന്റഡ് ക്രോസ് ബാറുകള്‍ അറ്റകുറ്റപ്പണി നടത്തി പ്രവര്‍ത്തനക്ഷമമാക്കാന്‍ ജലവിഭവ വകുപ്പില്‍ നിന്ന് 64 ലക്ഷം രൂപയുടെ ഭരണാനുമതി ലഭിച്ചു.
ചെറുപുഴ പഞ്ചായത്തിലെ പാണ്ടിക്കടവ് വിസിബി-25 ലക്ഷം, പയ്യന്നൂര്‍ നഗരസഭയിലെ കുറ്റ്യോല്‍ വിസിബി-15 ലക്ഷം, കാങ്കോല്‍-ആലപ്പടമ്പ് പഞ്ചായത്തിലെ കരിങ്കുഴി ചെറിയ വിസിബി-3.65 ലക്ഷം, മൂലയില്‍ വിസിബി-5 ലക്ഷം, പെരിങ്ങോം വയക്കര പഞ്ചായത്തിലെ കക്കട്ട് താഴെ വിസിബി-5 ലക്ഷം, വാച്ചാല്‍ വിസിബി-5 ലക്ഷം, കരിവെള്ളൂര്‍ പെരളം പഞ്ചായത്തിലെ കല്ലത്ത് കൈപ്പാട്ട് വിസിബി-5 ലക്ഷം, കാനം വിരിപ്പുവയല്‍ വിസിബി-1 ലക്ഷം എന്നിങ്ങനെയാണിത്. പ്രവൃത്തികള്‍ പൂര്‍ത്തീകരിക്കുന്നതിന്റെ ഭാഗമായി ആ മേഖലയില്‍ നെല്‍കൃഷി വിസ്തൃതി വര്‍ധിപ്പിക്കാനും, ജലസേചന സൗകര്യമില്ലാതെ വയല്‍ തരിശിടുന്നത് ഒഴിവാക്കാനും സാധിക്കും.
നെല്‍കൃഷി വികസിപ്പിക്കുന്നതിന് ഉഴവുകൂലി, കാലിത്തീറ്റ വിതരണം, കാര്‍ഷിക യന്ത്രങ്ങളുടെ വിതരണം, ജലസേചനത്തിന് വിസിബി എന്നിവ ബ്ലോക്ക് പഞ്ചായത്തിന്റെ കീഴില്‍ നേരത്തെ നടപ്പാക്കിയിരുന്നു.