ആലത്തൂര്‍ ടൗണില്‍ വഴിമുടക്കി ടെലഫോണ്‍ പോസ്റ്റ്

ആലത്തൂര്‍: തിരക്കേറിയ ആലത്തൂര്‍ ടൗണില്‍ വഴിമുടക്കിയായി ടെലഫോണ്‍ പോസ്റ്റ്. നഗരത്തിലെ തകര്‍ന്ന അഴുക്കുചാല്‍ ഈയിടെ നന്നാക്കിയതോടെയാണ് നടവഴിയില്‍ സ്ലാബിനോട് ചേര്‍ന്ന് നില്‍ക്കുന്ന പോസ്റ്റ് മാര്‍ഗതടസം സൃഷ്ടിക്കുന്നത്. ഇതോടെ ടൗണില്‍ കാല്‍നട യാത്രയ്ക്ക് തടസ്സം സൃഷ്ടിക്കുന്ന പഴയ ടെലഫോണ്‍ പോസ്റ്റ് നീക്കം ചെയ്യണമെന്ന ആവശ്യവുമായി  യാത്രക്കാരും വ്യാപാരികളും രംഗത്തെത്തി.
മെയിന്‍ റോഡില്‍ പവിഴം കോര്‍ണര്‍ മുതല്‍ പഴയ ബസ് സ്റ്റാന്‍ഡ് വരെ 50 മീറ്ററിലാണ് പുതുതായി അഴുക്കുചാല്‍ പണിതത്. ഡ്രെയിനേജ് കം ഫുട്പാത്ത് പദ്ധതിയിലുള്‍പ്പെടുത്തി 10 ലക്ഷം രൂപ ചെലവഴിച്ചാണ് അഴുക്കുചാല്‍ നിര്‍മിച്ചത്. നടപ്പാതയില്‍ ഒരിടത്തും ഒരുവിധ കയ്യേറ്റങ്ങളും അനുവദിക്കരുതെന്നാണ് യാത്രക്കാര്‍ ആവശ്യപ്പെടുന്നത്.