മഴ തുടരുന്നു; പമ്പ അണക്കെട്ടില്‍ റെഡ് അലര്‍ട്
ഷട്ടറുകള്‍ തുറക്കേണ്ട സാഹചര്യമുണ്ടായാല്‍ ഇതറിയാതെ പുറം നാടുകളില്‍ നിന്നുള്ള തീര്‍ഥാടകര്‍ പമ്പയില്‍ കുളിക്കാനിറങ്ങുന്നത് അപകടമുണ്ടാക്കുമെന്ന് അധികൃതര്‍ മുന്നറിയിപ്പ് നല്‍കിയിട്ടുണ്ട്
പമ്പ: മഴ ശക്തമായി തുടരുന്നതിനാല്‍ പമ്പ അണക്കെട്ടില്‍ റെഡ് അലര്‍ട് പ്രഖ്യാപിച്ചു. ഡാമിന്റെ വൃഷ്ടി പ്രദേശത്ത് കനത്ത മഴ തുടരുകയാണ്. അണക്കെട്ടിലെ ജലനിരപ്പ് ഉയരുകയാണെങ്കില്‍ ഷട്ടറുകള്‍ തുറന്നേക്കും. ശബരിമല തീര്‍ഥാടകര്‍ പമ്പയില്‍ ഇറങ്ങരുതെന്ന് കലക്ടര്‍ മുന്നറിയിപ്പ് നല്‍കിയിട്ടുണ്ട്. 984 അടിയാണ് ഇപ്പോള്‍ ഡാമിലെ ജലനിരപ്പ്. 986 അടിയാണ് ഡാമിന്റെ പരമാവധി സംഭരണ ശേഷി. 984 എത്തിയാല്‍ ഡാമില്‍ റെഡ് അലര്‍ട്ട് പ്രഖ്യാപിക്കുമെന്ന് നേരത്തെ അറിയിച്ചിരുന്നു. ഷട്ടറുകള്‍ തുറക്കേണ്ട സാഹചര്യമുണ്ടായാല്‍ ഇതറിയാതെ പുറം നാടുകളില്‍ നിന്നുള്ള തീര്‍ഥാടകര്‍ പമ്പയില്‍ കുളിക്കാനിറങ്ങുന്നത് അപകടമുണ്ടാക്കുമെന്ന് അധികൃതര്‍ മുന്നറിയിപ്പ് നല്‍കിയിട്ടുണ്ട്.