എസ്ഐആര് ഫോം നല്കാനുള്ള അവസാനദിവസം ഇന്ന്; 25 ലക്ഷത്തിലേറെപ്പേരെ കണ്ടെത്താനായില്ല
തിരുവനന്തപുരം: വോട്ടര്പട്ടിക തീവ്ര പരിഷ്കരണത്തില് (എസ്ഐആര്) എന്യൂമറേഷന് ഫോം പൂരിപ്പിച്ചുനല്കേണ്ട സമയം ഇന്ന് തീരും. വിതരണം ചെയ്ത ഫോമുകളില് 99.9 ശതമാനത്തോളവും പൂരിപ്പിച്ചുകിട്ടിയെന്ന് തിരഞ്ഞെടുപ്പ് കമ്മീഷന് അറിയിച്ചു. കരട് വോട്ടര്പട്ടിക 23ന് പ്രസിദ്ധീകരിക്കും.മുമ്പ് വോട്ടര് പട്ടികയിലുണ്ടായിരുന്ന 25 ലക്ഷത്തിലേറെപ്പേരെ കണ്ടെത്താനായില്ലെന്ന് കമ്മീഷന് അറിയിച്ചു. രാഷ്ട്രീയപ്പാര്ട്ടികളുടെ പ്രതിനിധികളായ ബിഎല്എമാരുമായിച്ചേര്ന്ന് ഇവരെ കണ്ടെത്താന് ശ്രമിക്കും. കണ്ടെത്താനായില്ലെങ്കില് കരട് പട്ടികയില് ഉണ്ടാവില്ല. ഫോം പൂരിപ്പിച്ചു നല്കിയവരെല്ലാം കരട് പട്ടികയില് ഉണ്ടാകും. എസ്ഐആര് സമയപരിധി നീട്ടണമെന്ന കേരളത്തിന്റെ ഹരജി സുപ്രിംകോടതിയില് വ്യാഴാഴ്ച വരുന്നുണ്ട്. വ്യാഴാഴ്ച ബിഎല്എമാര്ക്ക് അപേക്ഷകള് ഒരുമിച്ചുനല്കാന് അനുമതി നല്കിയിട്ടുണ്ടെന്ന് മുഖ്യതിരഞ്ഞെടുപ്പ് ഓഫീസര് ഡോ. രത്തന് യു. കേല്ക്കര് പറഞ്ഞു.