സിഖ് വിവാഹങ്ങള് രജിസ്റ്റര് ചെയ്യാന് പ്രത്യേക ചട്ടം നാലുമാസത്തിനുള്ളില് രൂപീകരിക്കണം: സുപ്രിംകോടതി
ന്യൂഡല്ഹി: രാജ്യത്തെ സിഖ് മതക്കാരുടെ വിവാഹങ്ങള് രജിസ്റ്റര് ചെയ്യാനുള്ള ചട്ടങ്ങള് രൂപീകരിക്കാന് സംസ്ഥാന സര്ക്കാരുകള്ക്ക് സുപ്രിംകോടതി നിര്ദേശം നല്കി. 1909ലെ ആനന്ദ് മാര്യേജ് ആക്ട് നടപ്പാക്കാനുള്ള ചട്ടങ്ങള് രൂപീകരിക്കാനാണ് നിര്ദേശം. നാലുമാസത്തിനുള്ളില് ചട്ടങ്ങള് രൂപീകരിക്കണമെന്നും കോടതി നിര്ദേശിച്ചു. ''ഒരു ഭരണഘടനാ വാഗ്ദാനത്തിന്റെ വിശ്വസ്തത അളക്കുന്നത് അത് പ്രഖ്യാപിക്കുന്ന അവകാശങ്ങള് മാത്രമല്ല, ആ അവകാശങ്ങള് ഉപയോഗപ്രദമാക്കുന്ന സ്ഥാപനങ്ങളുമാണ്. ഒരു മതേതര റിപ്പബ്ലിക്കില്, ഒരു പൗരന്റെ വിശ്വാസത്തെ ഒരു പദവിയോ വൈകല്യമോ ആക്കി മാറ്റാന് സംസ്ഥാനം പാടില്ല. ആനന്ദ് കരാജ് ഒരു സാധുവായ വിവാഹമായി നിയമം അംഗീകരിക്കുകയും അത് രജിസ്റ്റര് ചെയ്യാന് ഒരു സംവിധാനവും അവശേഷിപ്പിക്കാതിരിക്കുകയും ചെയ്യുമ്പോള്, വാഗ്ദാനം പകുതി മാത്രമേ പാലിക്കപ്പെടുന്നുള്ളൂ.''-കോടതി നിരീക്ഷിച്ചു. സംസ്ഥാനങ്ങള് ചട്ടങ്ങള് രൂപീകരിക്കുന്നതു വരെ നിലവിലുള്ള പൊതു വിവാഹ നിയമങ്ങള് പ്രകാരം ആനന്ദ് കരാജ് വിവാഹങ്ങള് ഉടന് രജിസ്റ്റര് ചെയ്യാന് കോടതി നിര്ദ്ദേശിച്ചു. ദമ്പതികള് അഭ്യര്ത്ഥിച്ചാല് വിവാഹ സര്ട്ടിഫിക്കറ്റില് 'ആനന്ദ് കരാജ്' ആചാരത്തെക്കുറിച്ച് വ്യക്തമായി പരാമര്ശിക്കണം. ഒരു പൗരനും വിവാഹ തെളിവ് നിഷേധിക്കപ്പെടുന്നില്ലെന്ന് ഇത് ഉറപ്പാക്കുമെന്നും കോടതി വ്യക്തമാക്കി.