കോട്ടയം: റോഡിലൂടെ നടന്നുപോവുകയായിരുന്ന അമ്മയുടേയും മകളുടേയും മേല് കാറിടിച്ചു. മകള് മരിച്ചു.തോട്ടയ്ക്കാട് മാടത്താനി വടക്കേമുണ്ടയ്ക്കല് വി ടി രമേശിന്റെ മകള് ആര് അഭിദ പാര്വതി (18) ആണ് മരിച്ചത്. അമ്മ കുറുമ്പനാടം സെന്റ് ആന്റണീസ് അധ്യാപിക കെ ജി നിഷയെ (47) ഗുരുതര പരുക്കുകളോടെ മെഡിക്കല് കോളജ് ആശുപത്രിയില് പ്രവേശിപ്പിച്ചു. തൃക്കോതമംഗലം ഗവ. വിഎച്ച്എസ്എസ് പ്ലസ് ടു വിദ്യാര്ഥിനിയായിരുന്ന അഭിതയുടെ പരീക്ഷാ ഫലം പുറത്തുവന്ന് മണിക്കൂറുകള്ക്കുള്ളിലാണ് അപകടം. ഇന്നലെ വൈകിട്ട് ഏഴോടെ ചന്തക്കവല ഭാഗത്തായിരുന്നു സംഭവം. റോഡ് മുറിച്ചുകടന്ന് ബസ് സ്റ്റോപ്പിലേയ്ക്ക് വരികയായിരുന്നു അമ്മയും മകളും. കലക്ടറേറ്റ് ഭാഗത്തുനിന്ന് എത്തിയ കാര് ഇരുവരെയും ഇടിച്ചു വീഴ്ത്തുകയായിരുന്നു. നാട്ടുകാര് അമ്മയെയും മകളെയും ജനറല് ആശുപത്രിയില് എത്തിച്ചെങ്കിലും അഭിദയുടെ ജീവന് രക്ഷിക്കാനായില്ല. സഹോദരി: അഭിജ.