ഡോക്ടറെ വെട്ടിയത് ആരോഗ്യ വകുപ്പിനും മന്ത്രിക്കും ഡെഡിക്കേറ്റ് ചെയ്യുന്നുവെന്ന് സനൂപ്
കോഴിക്കോട്: താമരശേരി താലൂക്ക് ആശുപത്രിയില് ഡോക്ടറെ വെട്ടിയ സംഭവത്തില് പ്രതികരണവുമായി പ്രതി സനൂപ്. തന്റെ ആക്രമണം ആരോഗ്യ വകുപ്പിനും ആരോഗ്യ മന്ത്രി വീണ ജോര്ജ്, മെഡിക്കല് കോളജ് സൂപ്രണ്ട് എന്നിവര്ക്ക് ഡെഡിക്കേറ്റ് ചെയ്യുന്നുവെന്ന് പോലിസ് കസ്റ്റഡിലിരിക്കെ സനൂപ് പ്രതികരിച്ചു. അമീബിക് മസ്തിഷ്ക ജ്വരം മൂലമാണ് രണ്ടുമാസം മുമ്പ് ഒമ്പതു വയസുകാരിയായ മകള് മരിച്ചതെന്നാണ് കുടുംബം വിശ്വസിച്ചിരുന്നതെന്ന് സനൂപിന്റെ ഭാര്യ പറഞ്ഞു. എന്നാല്, അമീബിക് മസ്തിഷ്ക ജ്വരമല്ലെന്ന് പിന്നീട് മെഡിക്കല് കോളജില് നിന്നും അറിഞ്ഞു. അതോടെ സനൂപ് അസ്വസ്ഥനായിരുന്നു. മകളുടെ മരണകാരണം അമീബിക് മസ്തിഷ്കജ്വരം അല്ലെന്ന് പോസ്റ്റുമോര്ട്ടം റിപ്പോര്ട്ട് ലഭിച്ചിട്ടുണ്ടെന്നും നേരത്തെ റഫര് ചെയ്തിരുന്നെങ്കില് മകളുടെ ജീവന് രക്ഷിക്കാമായിരുന്നുവെന്ന് കോഴിക്കോട് മെഡിക്കല് കോളജിലെ ഡോക്ടര്മാര് പറഞ്ഞതായും സനൂപിന്റെ ഭാര്യ മാധ്യമങ്ങളോട് പറഞ്ഞു.
'' കുട്ടിയുടെ മരണത്തിന്റെ യഥാര്ഥ കാരണം തേടി രണ്ടാഴ്ചയായി ഞങ്ങള് ഓട്ടത്തിലായിരുന്നു. കഴിഞ്ഞ ആഴ്ച മെഡിക്കല് കോളജില്നിന്ന് പോസ്റ്റുമോര്ട്ടവുമായി ബന്ധപ്പെട്ട് റിപ്പോര്ട്ട് ലഭിച്ചു. കുട്ടിക്ക് അമീബിക് മസ്തിഷ്ക ജ്വരം അല്ലായിരുന്നുവെന്നാണ് ഡോക്ടര് ഭര്ത്താവിനോട് പറഞ്ഞത്. നേരത്തെ റഫര് ചെയ്തിരുന്നെങ്കില് ജീവന് രക്ഷിക്കാമായിരുന്നുവെന്നും അവര് പറഞ്ഞു. ഇതിന് ശേഷം ഭര്ത്താവ് അസ്വസ്ഥനും കടുത്ത മാനസിക സംഘര്ഷത്തിലുമായിരുന്നു.''- സനൂപിന്റെ ഭാര്യ പറഞ്ഞു.
പനിയെ തുടര്ന്ന് ആദ്യം എത്തിയ താമരശ്ശേരി താലൂക്ക് ആശുപത്രിയില്നിന്ന് മതിയായ ചികിത്സ ലഭിക്കാത്തതാണ് കുഞ്ഞിന്റെ മരണത്തിന് കാരണമെന്ന് തങ്ങള് വിശ്വസിക്കുന്നുവെന്നും അവര് കൂട്ടിച്ചേര്ത്തു. മക്കളേയും കൂട്ടിയാണ് സനൂപ് വീട്ടില്നിന്ന് പോയത്. അവര്ക്ക് ഭക്ഷണം വാങ്ങിച്ചുകൊടുത്ത് വിട്ടുവെന്നും ഭാര്യ വ്യക്തമാക്കി.