പത്തനംതിട്ട: ശബരിമല ക്ഷേത്രത്തിലെ സ്വര്ണക്കൊള്ളയുമായി ബന്ധപ്പെട്ട കേസില് ദേവസ്വം മുന് കമ്മീഷണര് എന് വാസു അറസ്റ്റില്. കേസില് മൂന്നാം പ്രതിയാണ് വാസു. ദേവസ്വം കമ്മീഷണറായിരുന്ന കാലയളവില് ശബരിമല സന്നിധാനത്തെ സ്വര്ണം പൊതിഞ്ഞ കട്ടിളപ്പാളി സ്പോണ്സര് ഉണ്ണികൃഷ്ണന് പോറ്റിക്ക് കൈമാറിയതുമായി ബന്ധപ്പെട്ട കേസിലാണ് അറസ്റ്റ്. സ്വര്ണം പൂശലുമായി ബന്ധപ്പെട്ട് സ്പോണ്സറുടെ കൈവശം ബാക്കി സ്വര്ണം ഉണ്ടെന്നറിഞ്ഞിട്ടും വാസു നടപടിയെടുത്തില്ലെന്നാണ് പ്രത്യേക അന്വേഷണ സംഘം ആരോപിക്കുന്നത്.
സ്വര്ണക്കൊള്ള നടന്ന 2019ല് എന്. വാസു ദേവസ്വം ബോര്ഡ് കമ്മീഷണറായിരുന്നു. കട്ടിളപ്പാളിയിലെ സ്വര്ണപ്പാളികള് ചെമ്പാണെന്ന് എഴുതാന് കമ്മിഷണറായിരുന്ന വാസു 2019 മാര്ച്ച് 19-ന് നിര്ദേശം നല്കിയെന്ന് സ്ഥിരീകരിച്ചതിനെ തുടര്ന്നാണ് വാസുവിനെ കേസില് മൂന്നാം പ്രതിയാക്കിയത്. മാര്ച്ച് 31ന് കമ്മിഷണര്സ്ഥാനത്തുനിന്ന് വാസു മാറിയിരുന്നു. പിന്നീട് എ പത്മകുമാറിന് പിന്നാലെ ദേവസ്വം ബോര്ഡ് പ്രസിഡന്റായി.
എന്. വാസു പ്രസിഡന്റായിരിക്കെയാണ് സ്വര്ണംപൂശല് കഴിഞ്ഞശേഷം ഉണ്ണികൃഷ്ണന് പോറ്റിയുടെ വിവാദ ഇ-മെയില് സന്ദേശം ലഭിച്ചത്. സ്വര്ണം പൂശല് കഴിഞ്ഞശേഷവും സ്വര്ണം ബാക്കിയുണ്ടെന്നും ഇത് ഒരു പെണ്കുട്ടിയുടെ വിവാഹത്തിന് ചെലവഴിക്കട്ടേയെന്നും ചോദിച്ചായിരുന്നു പോറ്റിയുടെ ഇ-മെയില് സന്ദേശം. എന്നാല്, ഇതുസംബന്ധിച്ച് വാസു നല്കിയ വിശദീകരണം തൃപ്തികരമായിരുന്നില്ല. ഇമെയില് സന്ദേശം താന് മറ്റുള്ളവര്ക്ക് ഫോര്വേഡ് ചെയ്തെന്നും പിന്നീട് അതേക്കുറിച്ച് തിരക്കിയില്ലെന്നുമായിരുന്നു ഇദ്ദേഹത്തിന്റെ പ്രതികരണം.`1