സസ്പെന്ഷന് മാറിയിട്ട് പാര്ട്ടിയില് തിരിച്ചെടുക്കുന്ന സമയത്ത് കാണണമെന്ന് പരാതിക്കാരി; പേടിപ്പിക്കരുതെന്ന് രാഹുല് മാങ്കൂട്ടത്തില്; ചാറ്റ് പുറത്ത്
പത്തനംതിട്ട: പാലക്കാട്ട് എംഎല്എ രാഹുല് മാങ്കൂട്ടത്തിലും മൂന്നാം പീഡനക്കേസിലെ പരാതിക്കാരിയും തമ്മിലുള്ള ചാറ്റ് വിവരങ്ങള് പുറത്ത്. ഇരുവരും തമ്മില് അഭിപ്രായ വ്യത്യാസം രൂപപ്പെട്ടതിന് പിന്നാലെയുള്ള ചാറ്റുകളാണ് പുറത്ത് വന്നത്. സസ്പെന്ഷന് മാറിയിട്ട് പാര്ട്ടിയില് തിരിച്ചെടുക്കുന്ന സമയത്ത് നമുക്ക് ഒന്ന് കാണണമെന്ന് പരാതിക്കാരി പറയുന്നുണ്ട്. ഈ പേടിപ്പിക്കുന്ന പരിപാടി ഒരുമാസം മുമ്പ് വരെ ഒക്കെ നടത്തിയാല് അല്പ്പം എങ്കിലും ഞാന് മൈന്ഡ് ചെയ്യുമായിരുന്നു എന്നാണ് രാഹുല് ഇതിന് മറുപടി പറയുന്നത്. ''പലതും തുറന്നുപറയാന് തന്നെയാണ് തീരുമാനം. ഞാന് മാത്രം മോശവും ഇവര് പുണ്യാളത്തികളുമായിട്ടുള്ള പരിപാടി ഇനി നടക്കില്ല. നീ ചെയ്യാന് ഉള്ളത് ചെയ്. ബാക്കി ഞാന് ചെയ്തോളാം', എന്ന് രാഹുല് പറയുന്നതിന്റെ സ്ക്രീന്ഷോട്ടുകളും പുറത്തുവന്നു.
ഓടി നടന്ന് നീ തിരിച്ചുപിടിക്കാന് നോക്കുന്ന നിന്റെ ഇമേജ് ഉണ്ടല്ലോ, ബാക്കിയുള്ളവരുടെ ജീവിതം നശിപ്പിച്ചിട്ട് നീ ഇപ്പോള് സൂപ്പര് ഹീറോ പുണ്യാളന് ആണല്ലോയെന്ന് അതിജീവിത ചോദിക്കുമ്പോള് 'നീ ഇപ്പോള് പേടിപ്പിക്കുന്ന പരിപാടി ഒരു മാസം മുമ്പാക്കെ നടത്തിയാല് അല്പമെങ്കിലും ഞാന് മൈന്ഡ് ചെയ്യുമായിരുന്നു. ഞാന് എല്ലാ പരിധിയും കഴിഞ്ഞുനില്ക്കുന്നയാളാണ്. നീ ഈ പറയുന്ന ഇമേജ് തിരിച്ചുപിടിക്കല് ഒന്നും അല്ല മോളെ. അതൊക്കെ നിന്റെ തോന്നല് ആണ്. ഇനി ഒന്നിനോടും കീഴ്പ്പെടുന്നില്ലായെന്ന എന്റെ തീരുമാനം ഉണ്ട്. നീ എന്ത് ചെയ്താലും അതിന്റെ ബാക്കി ഞാനും ചെയ്യും. നീ ചെയ്യുന്നത് ഞാന് താങ്ങും. പക്ഷെ നീ താങ്ങില്ല. നീന്റെ ഭീഷണിയൊക്കെ നിര്ത്തിയേക്ക്. ഇവിടെ(പാലക്കാട്) വന്നാല് ഞാന് കുറേ ആളുകളുമായി നിന്റെ വീട്ടില് വരാം. അത്ര തന്നെ. അല്ലാണ്ട് ഇങ്ങോട്ട് ഉള്ള ഭീഷണി വേണ്ട''-രാഹുല് പറയുന്നു.
''നീ ചെയ്യാനുള്ളതൊക്കെ ചെയ്തുനീര്ത്തിട്ട് വാ. എന്ത് അറിഞ്ഞാലും എനിക്ക് ഒന്നും നഷ്ടപ്പെടാന് ഇല്ല. ആകെ ഇപ്പോള് ഇല്ലാത്തതും നീ എക്സ്ട്രാ ചെയ്യുമെന്ന് പറയുന്നതും കേസ് ആണ്. ഈ കേസ് കോടതിയില് വരുമ്പോള് ഉള്ള അവസ്ഥ അറിയാല്ലോ. അതും പ്രത്യേകിച്ച് ഒന്നും ഇല്ല. അപ്പോള് നീ അതാക്കെ കഴിഞ്ഞിട്ട് വാ. നീ നന്നായി ജീവിക്കന്നെ. ആരെയാ നീ പേടിപ്പിക്കുന്നത്. എല്ലാം തീര്ന്നുനില്ക്കുന്ന ഒരാളെ നീ പേടിപ്പിക്കുന്നോ? നീ വാര്ത്താസമ്മേനളനം നടത്തൂ''-എന്നും രാഹുല് പറയുന്നു.