തിരുവനന്തപുരം: ജിഎസ്ടി ഇളവിന്റെ ഭാഗമായി നെയ്യ്, വെണ്ണ, പനീര്, ഐസ്ക്രീം തുടങ്ങി നിരവധി പാല് ഉല്പന്നങ്ങളുടെ വില കുറയുമെന്ന് മില്മ. നെയ്യ് വില ലിറ്ററിന് 45 രൂപയാണ് കുറയുക. ഇതോടെ നെയ്യ് വില നിലവിലെ 720 രൂപയില്നിന്ന് 675 രൂപയാകും. 370 രൂപയുണ്ടായിരുന്ന അര ലീറ്റര് നെയ്യ് 25 രൂപ കുറഞ്ഞ് 345 രൂപയ്ക്ക് ലഭിക്കും. 240 രൂപയുണ്ടായിരുന്ന 400 ഗ്രാം വെണ്ണ 15 രൂപ കുറഞ്ഞ് ഇനിമുതല് 225 രൂപയ്ക്ക് ലഭിക്കും. 500 ഗ്രാം പനീറിന്റെ വില 245 രൂപയില് നിന്ന് 234 രൂപയായി കുറയും. വാനില ഐസ്ക്രീം ഒരു ലീറ്ററിന് 220 രൂപയില്നിന്ന് 196 രൂപയായി കുറച്ചിട്ടുണ്ട്. ജിഎസ്ടി നിരക്ക് 18 ശതമാനത്തില് നിന്ന് അഞ്ച് ശതമാനമാക്കി കുറച്ചതിനാല് 24 രൂപയുടെ കിഴിവ് ലഭ്യമാകുമെന്ന് മില്മ ചെയര്മാന് കെ എസ് മണി പറഞ്ഞു.