തെല്‍ അവീവ്: ഇസ്രായേലിലേക്ക് ഇറാന്‍ നൂറുകണക്കിന് ഡ്രോണുകള്‍ അയച്ചതായി റിപോര്‍ട്ട്. നിലവില്‍ ഈ ഡ്രോണുകള്‍ ഇറാഖിന്റെ മുകളിലൂടെ സഞ്ചരിച്ചു കൊണ്ടിരിക്കുകയാണെന്ന് റിപോര്‍ട്ടുകള്‍ പറയുന്നു.
ഇന്ന് പുലര്‍ച്ചെ തെഹ്‌റാന്‍ അടക്കമുള്ള പ്രദേശങ്ങളില്‍ ഇസ്രായേല്‍ ആക്രമിച്ചതിന് മറുപടിയായാണ് ആക്രമണം. ഈ ഡ്രോണുകള്‍ ഇസ്രായേലില്‍ എത്താന്‍ സമയമെടുക്കും. ഇവയെ വെടിവച്ചിടാന്‍ തയ്യാറെടുക്കുകയാണെന്ന് ഇസ്രായേലി സൈന്യം പറയുന്നു.
ഷാഹിദ്-136 എന്ന ഡ്രോണ്‍ ആണ് ഇറാന്‍ ഉപയോഗിച്ചിരിക്കുന്നതെന്ന് സൈനിക വിദഗ്ദര്‍ ചൂണ്ടിക്കാട്ടുന്നു. ലക്ഷ്യത്തെ ആക്രമിക്കാന്‍ ഉള്ള വണ്‍വേ ഡ്രോണുകളാണ് ഇവ. മണിക്കൂറില്‍ 185 കിലോമീറ്റര്‍ വേഗത്തില്‍ സഞ്ചരിക്കുന്ന ഈ ഡ്രോണില്‍ 50 കിലോഗ്രാം സ്‌ഫോടകവസ്തുക്കള്‍ കൊണ്ടുപോവാം. ജിപിഎസ്-ജിഎല്‍ഒഎന്‍എഎസ്എസ് സാങ്കേതിക വിദ്യ ഉപയോഗിക്കുന്നതിനാല്‍ ഇലക്ട്രോണിക് സംവിധാനങ്ങള്‍ കൊണ്ട് തടയാന്‍ കഴിയില്ല.