തൊടുപുഴ: മൂലമറ്റം വൈദ്യുതി നിലയത്തിലെ ആറു ജനറേറ്ററുകളുടെയും പ്രവര്ത്തനം ഇന്നലെ രാത്രി ഒന്പതോടെ നിര്ത്തി. കുളമാവിലെ ഇന്ടേക് വാല്വിന്റെ ഷട്ടറും അടച്ചു. പുലര്ച്ചെ രണ്ടിന് ഒരു ജനറേറ്റര് പ്രവര്ത്തിപ്പിച്ച് പെന്സ്റ്റോക്കിലെ വെള്ളം ഒഴുക്കിക്കളഞ്ഞു. ഇന്നു രാവിലെ 9ന് അറ്റകുറ്റപ്പണികള് തുടങ്ങും. ഇതോടെ തൊടുപുഴ നഗരത്തിലും സമീപത്തെ 7 പഞ്ചായത്തുകളിലും കോട്ടയം, എറണാകുളം, ആലപ്പുഴ ജില്ലകളിലെ വിവിധ പ്രദേശങ്ങളിലും ശുദ്ധജലക്ഷാമം നേരിടാന് സാധ്യതയുണ്ട്. ആലപ്പുഴയിലെ ചേര്ത്തല താലൂക്കിലെ 18 പഞ്ചായത്തുകളിലും ചേര്ത്തല നഗരസഭയിലും ശുദ്ധജലവിതരണം മുടങ്ങാന് സാധ്യതയുള്ളതായി ജല അതോറിറ്റി അറിയിച്ചു. മൂവാറ്റുപുഴയാറിലെ ജലനിരപ്പ് ക്രമാതീതമായി താഴാന് സാധ്യതയുള്ളതിനാല് ആറിലെ ജലത്തെ ആശ്രയിച്ചു നില്ക്കുന്ന കോട്ടയം ജില്ലയിലെ വൈക്കം മേഖലയിലും എറണാകുളത്തെ വിവിധ പ്രദേശങ്ങളിലും ശുദ്ധജലവിതരണം തടസ്സപ്പെട്ടേക്കും. 5, 6 ജനറേറ്ററുകളുടെ അപ്സ്ട്രീം സീലുകളുടെ അറ്റകുറ്റപ്പണിക്കായാണു നിലയം അടച്ചിടുന്നത്. അറ്റകുറ്റപണികള് തീരാന് ഒരു മാസമെടുക്കുമെന്നാണ് അധികൃതര് പറയുന്നത്.