''മാലാഖ കുഞ്ഞുങ്ങള് സ്വര്ഗത്തില്നിന്ന് തങ്ങളോട് ക്ഷമിക്കട്ടെ'' : രാഹുലിനെതിരേ പരാതി നല്കിയ യുവതി
തിരുവനന്തപുരം: വിവാഹ വാഗ്ദാനം നല്കി പീഡിപ്പിച്ചെന്ന കേസില് പാലക്കാട് എംഎല്എ രാഹുല് മാങ്കൂട്ടത്തില് അറസ്റ്റിലായതില് പ്രതികരണവുമായി ആദ്യം പരാതി നല്കിയ യുവതി. ദൈവത്തിന് നന്ദിയെന്ന് യുവതി ഫെയ്സ്ബുക്കില് കുറിച്ചു. ഇരുട്ടില് ചെയ്ത പ്രവൃത്തികള് ദൈവം കണ്ടെന്നും മാലാഖ കുഞ്ഞുങ്ങള് സ്വര്ഗത്തില്നിന്ന് തങ്ങളോട് ക്ഷമിക്കട്ടെയെന്നും യുവതി ഫെയ്സ്ബുക്കില് കുറിച്ചു. എങ്ങും എത്താതിരുന്ന നിലവിളി ദൈവം കേട്ടെന്നും തെറ്റായ വ്യക്തിയെ വിശ്വസിച്ച് കുട്ടിയുടെ പിതാവാകാന് യോഗ്യനല്ലാത്ത ഒരാളെ തിരിഞ്ഞെടുത്തതിന് ക്ഷമ ചോദിക്കുന്നുവെന്നും യുവതിയുടെ ഫേസ്ബുക്ക് പോസ്റ്റ് പറയുന്നു.
ഫേസ്ബുക്ക് പോസ്റ്റിന്റെ പൂര്ണ്ണരൂപം
പ്രിയപ്പെട്ട ദൈവമേ, എല്ലാ വേദനകളും, വിധികളും, വഞ്ചനകളും സഹിച്ച് മുന്നോട്ട് പോകാന് ധൈര്യം നല്കിയതിന് നന്ദി. ഇരുട്ടില് അയാള് ചെയ്ത പ്രവൃത്തി നീ കണ്ടു. ലോകത്തിന് മുന്നില് എത്താതിരുന്ന നിലവിളികള് നീ കേട്ടു. ഞങ്ങളുടെ ശരീരം ആക്രമിക്കപ്പെട്ടപ്പോഴും ഞങ്ങളുടെ കുഞ്ഞുങ്ങളെ ബലപ്രയോഗത്തിലൂടെ തട്ടിയെടുത്തപ്പോളും നീ ഞങ്ങളെ ചേര്ത്തു പിടിച്ചു. ആ മാലാഖ കുഞ്ഞുങ്ങള് സ്വര്ഗത്തില് നിന്ന് ഞങ്ങളോട് ക്ഷമിക്കട്ടെ. തെറ്റായ വ്യക്തിയെ വിശ്വസിച്ച് കുട്ടിയുടെ പിതാവാകാന് യോഗ്യനല്ലാത്ത ഒരാളെ തിരിഞ്ഞെടുത്തതിന് ക്ഷമ ചോദിക്കുന്നു.
ആ മാലാഖ കുഞ്ഞുങ്ങളുടെ ആത്മാക്കള് സമാധാനത്തോടെ വിശ്രമിക്കട്ടെ. അക്രമത്തില് നിന്നും ഭയത്തില് നിന്നും ഞങ്ങളെ സംരക്ഷിക്കാന് കഴിയാത്ത ഈ ലോകത്തില് നിന്നും ആ മാലാഖ കുഞ്ഞുങ്ങള് സ്വതന്ത്രരായിരിക്കട്ടെ. നമ്മുടെ കണ്ണുനീര് സ്വര്ഗത്തില് എത്തിയാല്, അവര് നിങ്ങളോട് ഇക്കാര്യം പറയട്ടെ. നിങ്ങളുടെ അമ്മ ഒരിക്കലും നിങ്ങളെ മറന്നില്ല. നിങ്ങളുടെ അസ്തിത്വം പ്രധാനമാണ്. നിങ്ങളുടെ ആത്മാവ് പ്രധാനമാണ്. വീണ്ടും കണ്ടുമുട്ടുന്നതുവരെ അമ്മമാര് നിങ്ങളെ ഞങ്ങളുടെ ഹൃദയങ്ങളില് താലോലിക്കും. കുഞ്ഞാറ്റേ, അമ്മ നിന്നെ അങ്ങേയറ്റം സ്നേഹിക്കുന്നു.