ഇടുക്കിയില്‍ ജീപ്പ് കൊക്കയിലേക്ക് മറിഞ്ഞ് ദമ്പതികള്‍ അടക്കം മൂന്നു പേര്‍ മരിച്ചു

അടിമാലി: രാജാക്കാട് പന്നിയാര്‍കുട്ടിക്ക് സമീപം ജീപ്പ് കൊക്കയിലേക്ക് മറിഞ്ഞ് ദമ്പതികള്‍ അടക്കം മൂന്നുപേര്‍ മരിച്ചു. പന്നിയാര്‍ കുട്ടി ഇടയോട്ടിയില്‍ ബോസ് (55) ഭാര്യ റീന (48), പന്നിയാര്‍കുട്ടി തട്ടപ്പിള്ളിയില്‍ എബ്രഹാം(50) എന്നിവരാണ് മരിച്ചത്. ഇന്നലെ രാത്രി 10.30ഓടെ ആയിരുന്നു സംഭവം. പന്നിയാര്‍ കുട്ടി പുതിയപാലത്തിനു സമീപമാണ് ബോസും ഭാര്യയും താമസിക്കുന്നത്. മുല്ലക്കാനത്ത് ബന്ധുവീട്ടില്‍ പോയി തിരികെ വരികയായിരുന്നു. പന്നിയാര്‍ കുട്ടി പള്ളിക്ക് സമീപം എത്തിയപ്പോള്‍ നിയന്ത്രണം വിട്ട ജീപ്പ് നൂറടി താഴ്ചയിലേക്ക് മറിയുകയായിരുന്നു. പരിക്കേറ്റ മൂന്നു പേരെയും അടിമാലി താലൂക്ക് ആശുപത്രിയില്‍ എത്തിച്ചെങ്കിലും ബോസും റീനയും വരും വഴി മരണപ്പെട്ടു. എബ്രഹാം ചികില്‍സയിലിരിക്കെ മരിച്ചു. മരിച്ച റീന ഒളിമ്പ്യന്‍ കെ എം ബീനാ മോളുടെ സഹോദരിയാണ്. എബ്രഹാം ആണ് ജീപ്പ് ഓടിച്ചിരുന്നത്.