പാതിവ്രത്യം തെളിയിക്കാന് യുവതിയെ 'അഗ്നിപരീക്ഷയ്ക്ക്' ഇരയാക്കി ഭര്ത്താവിന്റെ കുടുംബം
മെഹ്സാന: പാതിവ്രത്യം തെളിയിക്കാന് തിളച്ച എണ്ണയില് കൈകള് മുക്കാന് നിര്ബന്ധിതയായ 30കാരിക്ക് ഗുരുതരമായി പൊള്ളലേറ്റു. ഗുജറാത്തിലെ മെഹ്സാന ജില്ലയിലാണ് സംഭവം. യുവതിയുടെ പരാതിയുടെ അടിസ്ഥാനത്തില് ഭര്ത്താവിന്റെ സഹോദരി ജമുന താക്കൂര്, ജമുനയുടെ ഭര്ത്താവ് മനുഭായ് താക്കൂര്, മറ്റ് രണ്ട് പേര് എന്നിവര്ക്കെതിരെ വിജാപൂര് പോലിസ് കോസെടുത്തു. സെപ്റ്റംബര് 16ന് ഗെരിറ്റ ഗ്രാമത്തിലാണ് സംഭവം. ഒരു സ്ത്രീയും മറ്റ് മൂന്ന് പേരും ചേര്ന്ന് ഇരയെ തിളച്ച എണ്ണയില് കൈകള് മുക്കാന് നിര്ബന്ധിക്കുന്നത് വീഡിയോയില് കാണാം. യുവതി വിരലുകള് മുക്കുന്നതും പൊള്ളലേറ്റതിനാല് വേഗത്തില് പിന്വലിക്കുന്നതും ദൃശ്യങ്ങളിലുണ്ട്. ''ഇരയായ യുവതിക്ക് ഭര്ത്താവിനോട് വിശ്വസ്തതയില്ലെന്ന് നാത്തൂന് സംശയിച്ചിരുന്നു. അതിനാല് ജമുനയും ഭര്ത്താവും മറ്റ് രണ്ട് പുരുഷന്മാരും ചേര്ന്ന് യുവതിയെ അഗ്നിപരീക്ഷയ്ക്ക് വിധേയയാക്കാന് തീരുമാനിച്ചു. യുവതി പതിവ്രതയാണെങ്കില് പൊള്ളലേല്ക്കില്ലെന്ന് അവര് അവളോട് പറഞ്ഞു.''- ഡെപ്യൂട്ടി പോലിസ് സൂപ്രണ്ട് ദിനേശ് സിംഗ് ചൗഹാന് പറഞ്ഞു. പ്രതികളെ പിടികൂടാനുള്ള ശ്രമങ്ങള് നടക്കുകയാണെന്നും അദ്ദേഹം കൂട്ടിച്ചേര്ത്തു.