കേരളത്തിലെ എസ്ഐആര് മാറ്റിവയ്ക്കില്ലെന്ന് കേന്ദ്ര തിരഞ്ഞെടുപ്പ് കമ്മീഷന്
ന്യൂഡല്ഹി: കേരളത്തില് നടക്കുന്ന തീവ്ര വോട്ടര് പട്ടിക പരിഷ്കരണം ഒരു കാരണവശാലും മാറ്റിവെക്കാന് ആകില്ലെന്ന് കേന്ദ്ര തിരഞ്ഞെടുപ്പ് കമ്മീഷന്. കണ്ണൂരില് ബിഎല്ഒ ആയിരുന്ന അനീഷ് ജോര്ജിന്റെ മരണം എസ്ഐആര് ജോലി ഭാരം കൊണ്ടാണെന്ന് ഒരു അന്വേഷണത്തിലും കണ്ടെത്തിയിട്ടില്ലെന്നും കമ്മീഷന് സുപ്രിംകോടതിയില് വ്യക്തമാക്കി. വോട്ടര് പട്ടിക പരിഷ്കരണവും കേരളത്തിലെ തദ്ദേശ തിരഞ്ഞെടുപ്പും ഒരുമിച്ച് നടക്കുന്നത് അസാധാരണമല്ല. സ്പെഷ്യല് സമ്മറി റിവിഷനില് എന്യുമറേഷന് ഒഴികെ എസ്ഐആറില് നടക്കുന്ന എല്ലാ നടപടികളും ഉണ്ട്. നിലവില് നടക്കുന്ന തീവ്ര വോട്ടര് പട്ടിക പരിഷ്കരണം കാരണം സംസ്ഥാന ഭരണം സ്തംഭനാവസ്ഥയില് എത്തുമെന്ന വാദം തെറ്റാണെന്നും കേന്ദ്ര തിരഞ്ഞെടുപ്പ് കമ്മീഷന് അവകാശപ്പെട്ടു.