ദേശീയപാതയിലെ വിള്ളല്: ഭൂപ്രകൃതിക്കനുസരിച്ചുള്ള നടപടികള് സ്വീകരിച്ചോയെന്ന് പരിശോധിക്കും: മുഖ്യമന്ത്രി
തിരുവനന്തപുരം: നിര്മാണത്തിലിരിക്കുന്ന ദേശീയ പാതകളിലെ വിള്ളലും ഇടിഞ്ഞുവീണ സംഭവങ്ങളും ദൗര്ഭാഗ്യകരമാണെന്ന് മുഖ്യമന്ത്രി പിണറായി വിജയന്. ഭൂപ്രകൃതിക്കനുസരിച്ചാണോ നിര്മാണം നടന്നതെന്ന് സംബന്ധിച്ച് ദേശീയപാത അതോറിറ്റിയുമായി ചര്ച്ച നടത്തുമെന്നും മുഖ്യമന്ത്രി പറഞ്ഞു. മലപ്പുറം കൂരിയാട് ദേശീയപാത സര്വീസ് റോഡിലേക്ക് ഇടിഞ്ഞു വീണതടക്കം കഴിഞ്ഞ ദിവസങ്ങളിലായി നിര്മാണത്തിലിരുന്ന പാതയില് മൂന്നിടങ്ങളില് വിള്ളല് വീണതിന്റെ പശ്ചാത്തലത്തിലായിരുന്നു മുഖ്യമന്ത്രിയുടെ പ്രതികരണം.
'ദേശീയപാത നിര്മാണം നല്ലരീതിയില് പുരോഗമിച്ചുകൊണ്ടിരിക്കുകയാണ്. അതിനിടയിലുണ്ടായ സംഭവങ്ങള് നിര്ഭാഗ്യകരമാണ്. അതുമായി ബന്ധപ്പെട്ട് ദേശീയപാത അതോറിറ്റിയുമായി ചര്ച്ച ചെയ്ത് നടപടികള് സ്വീകരിക്കും. ഭൂപ്രകൃതിക്കനുസരിച്ചുള്ള നടപടി സ്വാഭാവികമായും സ്വീകരിക്കേണ്ടതുണ്ട്. അതില് വീഴ്ചയുണ്ടായിട്ടുണ്ടോയെന്ന് ദേശീയപാത അതോറിറ്റിയുമായി ചര്ച്ച നടത്തും'-മുഖ്യമന്ത്രി പറഞ്ഞു.
മോഷണക്കുറ്റം ആരോപിച്ച് തിരുവനന്തപുരത്ത് ദലിത് യുവതിയെ പോലിസ് സ്റ്റേഷനില് പൂട്ടിയിട്ടത് സംഭവിക്കാന് പാടില്ലാത്തതായിരുന്നുവെന്നും മുഖ്യമന്ത്രി വ്യക്തമാക്കി. 'സാധാരണ നിലക്ക് പോലിസിന്റെ ഭാഗത്ത് നിന്ന് ഉണ്ടാകാന് പാടില്ലാത്തതാണ്. അതില് നടപടി എടുത്തിട്ടുണ്ട്. സംഭവത്തില് അവര് ഓഫിസിലെത്തി പരാതി പറഞ്ഞിരുന്നു. അക്കാര്യത്തില് പരിശോധനയ്ക്കുള്ള സമയം മാത്രമേ എടുത്തിട്ടുള്ളൂ. നടപടിയും എടുത്തു. അവര്ക്കുണ്ടായിരുന്ന മറ്റൊരു ആവശ്യം കേസില് ഇടപെടണമെന്നായിരുന്നു. കേസില് മുഖ്യമന്ത്രിയുടെ ഓഫീസിന് ഇടപെടാന് പറ്റില്ല. അത് പോലിസ് അന്വേഷിച്ച് നടപടികള് സ്വീകരിക്കുകയാണ് വേണ്ടത്. അത് അവരെ ബോധ്യപ്പെടുത്തിയിട്ടുണ്ടെന്നും മുഖ്യമന്ത്രി പറഞ്ഞു.