വോട്ടിനു മുന്പേ മലപ്പട്ടത്തും ആന്തൂരും രണ്ടുവീതം വാര്ഡുകളില് എല്ഡിഎഫിന് വിജയം
കണ്ണൂര്: തദ്ദേശ തിരഞ്ഞെടുപ്പില് നാമനിര്ദേശ പത്രിക നല്കാനുള്ള സമയം അവസാനിച്ചപ്പോള് കണ്ണൂരിലെ മലപ്പട്ടം ഗ്രാമപഞ്ചായത്തിലെയും ആന്തൂര് നഗരസഭയിലെയും രണ്ടു വീതം വാര്ഡുകളില് എല്ഡിഎഫ് സ്ഥാനാര്ഥികള്ക്ക് എതിരാളികളില്ല. മലപ്പട്ടം പഞ്ചായത്തിലെ 5ാം വാര്ഡ് അടുവാപ്പുറം നോര്ത്തില് എല്ഡിഎഫ് സ്ഥാനാര്ഥി ഐ വി ഒതേനന്, 6ാം വാര്ഡില് സി കെ ശ്രേയ എന്നിവരാണ് എതിരില്ലാതെ വിജയിച്ചത്. ഈ വാര്ഡുകളില് മറ്റാരും പത്രിക നല്കിയില്ല. ആന്തൂര് നഗരസഭയില് മൊറാഴ വാര്ഡില് കെ രജിതയ്ക്കും പൊടിക്കുണ്ട് വാര്ഡില് കെ പ്രേമരാജനും എതിരില്ല. എല്ഡിഎഫിന് പ്രതിപക്ഷമില്ലാത്ത നഗരസഭയാണ് ആന്തൂര്. സിപിഎമ്മിന്റെ ശക്തികേന്ദ്രമാണ് മലപ്പട്ടം ഗ്രാമപഞ്ചായത്ത്. കോണ്ഗ്രസ് സ്ഥാപിച്ച ഗാന്ധിസ്തൂപം തകര്ത്തതുമായി ബന്ധപ്പെട്ട് മേയില് ഇവിടെ സംഘര്ഷമുണ്ടായിരുന്നു.
കണ്ണപുരം പഞ്ചായത്ത് ഭരണസമിതിയിലേക്കുള്ള രണ്ട് സീറ്റിലും എല്ഡിഎഫ് സ്ഥാനാര്ഥികള് എതിരില്ലാതെ തെരഞ്ഞെടുക്കപ്പെട്ടു. കണ്ണപുരം 13ാം വാര്ഡില് പി രീതിയും 14ാം വാര്ഡില് പി വി രേഷ്മയും ആണ് തെരഞ്ഞെടുക്കപ്പെട്ടത്. ഇരുവരും സിപിഎമ്മുകാരാണ്.