യുവനടിയെ തട്ടിക്കൊണ്ടുപോവുമ്പോള് പള്സര് സുനി നിരന്തരം സംസാരിച്ച ശ്രീലക്ഷ്മി ആരാണ്? ചോദ്യമുന്നയിച്ച് വിചാരണക്കോടതി
കൊച്ചി: യുവനടിയെ തട്ടിക്കൊണ്ടുപോയി ലൈംഗികമായി പീഡിപ്പിച്ച കേസിലെ ഒന്നാം പ്രതി പള്സര് സുനി സംഭവ സമയത്ത് നിരന്തരമായി ഫോണില് ംസാരിച്ച ശ്രീലക്ഷ്മി ആരാണെന്ന് വിചാരണക്കോടതി. നടിയെ തട്ടിക്കൊണ്ടുപോവുന്ന സമയത്തും നടിയുടെ കൂടെയുള്ള സമയത്തും പള്സര് സുനി ശ്രീലക്ഷ്മിയുമായി സംസാരിച്ചിരുന്നുവെന്നും പക്ഷേ, ശ്രീലക്ഷ്മിയെ പോലിസ് കേസില് സാക്ഷിയാക്കിയില്ലെന്നും കോടതി ചൂണ്ടിക്കാട്ടി. ഒരു സ്ത്രീയുടെ ക്വട്ടേഷന് പ്രകാരമാണ് യുവനടിയെ ആക്രമിക്കുന്നതെന്ന് പള്സര് സുനി പറഞ്ഞെന്ന യുവനടിയുടെ മൊഴിയുടെ പശ്ചാത്തലത്തില് ശ്രീലക്ഷ്മിയെ കുറിച്ച് എന്തുകൊണ്ട് പോലിസ് അന്വേഷണം നടത്തിയില്ലെന്ന് കോടതി ചോദിച്ചു. യുവനടിയുടെ വീഡിയോ ചിത്രീകരിക്കുന്നതിന് അരമണിക്കൂര് മുമ്പ് വരെ പള്സര് സുനി, ശ്രീലക്ഷ്മിക്ക് സന്ദേശങ്ങള് അയച്ചിരുന്നു. ഫെബ്രുവരി 23ന് സുനി അറസ്റ്റിലായ ശേഷവും ശ്രീലക്ഷ്മി, സുനിയെ ഫോണില് വിളിച്ചെന്നും കോടതി ചൂണ്ടിക്കാട്ടി.
അക്രമം നടന്ന 2017 ഫെബ്രുവരി പതിനേഴിന് ശ്രീലക്ഷ്മിയുടെ ഫോണില് നിന്ന് വൈകീട്ട് 3.44 വരെ പള്സര് സുനിയുടെ ഫോണിലേക്ക് സന്ദേശങ്ങള് വന്നുകൊണ്ടിരുന്നു. വൈകീട്ട് 6.22 മുതല് 7.59 വരെ ശ്രീലക്ഷ്മി ആറുതവണ പള്സര് സുനിയെ വിളിച്ചു. രാത്രി 9.03 മുതല് 9.56 വരെ ശ്രീലക്ഷ്മി ഏഴു സന്ദേശങ്ങളും അയച്ചു. യുവനടിയുടെ വീഡിയോ ചിത്രീകരിച്ചത് രാത്രി 10.30നും 10.48നും ഇടയിലാണ്. രാത്രി 9.56നാണ് ശ്രീലക്ഷ്മിയുടെ അവസാന സന്ദേശം സുനിക്ക് എത്തിയത്.
യുവനടിയുമായി സഞ്ചരിക്കുമ്പോഴും സുനി ശ്രീലക്ഷ്മിയെ വിളിക്കുന്നുണ്ടായിരുന്നു. പക്ഷേ, പോലിസ് ശ്രീലക്ഷ്മിയെ സാക്ഷിയാക്കിയില്ല. കൂടാതെ ശ്രീലക്ഷ്മിയുടെ മൊബൈല് ഫോണ് ലൊക്കേഷന്, കോള് വിവരങ്ങള് എന്നിവ ഹാജരാക്കിയുമില്ല. എട്ടാം പ്രതിയായ ദിലീപും സുനിയും തമ്മില് ഉണ്ടെന്ന് ആരോപിക്കപ്പെടുന്ന ബന്ധത്തില് കൂടുതല് തെളിവ് നല്കാന് ശ്രീലക്ഷ്മിക്ക് സാധിക്കാമായിരുന്നു. സുനിയും ശ്രീലക്ഷ്മിയും തമ്മില് അടുത്ത സൗഹൃദമുണ്ടെന്നാണ് പ്രോസിക്യൂഷന് പറയുന്നത്. അപ്പോള് ദിലീപും സുനിയും തമ്മില് ബന്ധമുണ്ടോയെന്ന കാര്യത്തില് ശ്രീലക്ഷ്മിക്ക് മൊഴി നല്കാന് സാധിക്കാമായിരുന്നു. ശ്രീലക്ഷ്മിയുടെ സ്വകാര്യത ഹനിക്കരുതെന്ന് പറഞ്ഞ് പോലിസ് അവരുടെ ഫോണിലെ വിവരങ്ങള് കോടതിയില് സമര്പ്പിച്ചില്ല. ഫോണില് എന്തൊക്കെ വിവരങ്ങളാണ് ഉള്ളതെന്ന് പറഞ്ഞില്ല. അതിനാല് ഈ വിവരങ്ങള് ശ്രീലക്ഷ്മിയുടെ സ്വകാര്യതയെ ഹനിക്കുമോയെന്ന് പരിശോധിക്കാനായില്ല. ശ്രീലക്ഷ്മിക്ക് മറ്റൊരു ഫോണും ഉണ്ടായിരുന്നതായി ഫോറന്സിക് റിപോര്ട്ട് പറയുന്നു. ആ ഫോണിന്റെ വിവരങ്ങളോ നമ്പറോ പോലും പോലിസ് കോടതിയില് നല്കിയില്ല. ശ്രീലക്ഷ്മിയെ ചോദ്യം ചെയ്തതിന്റെ വിവരങ്ങളൊന്നും പോലിസ് കോടതിയില് ഹാജരാക്കിയില്ല. സാക്ഷിയാക്കാത്തതിന് കാരണങ്ങളൊന്നും കാണിച്ചുമില്ല. സ്ത്രീയാണ് ക്വട്ടേഷന് നല്കിയതെന്ന നടിയുടെ മൊഴിയില് അന്വേഷണം നടത്താത്തതിനാല് പോലിസിന്റെ അന്വേഷണത്തില് ന്യായമായ സംശയമുണ്ടെന്നും കോടതി വിശദീകരിച്ചു.