റിയാദ്: 2026 ഫുട്ബോള് ലോകകപ്പിന് മാസങ്ങള് ശേഷിക്കെ, പരിശീലകനെ പുറത്താക്കി സൗദി അറേബ്യ. ഫ്രഞ്ച് പരിശീലകന് ഹെര്വ് റിനാര്ഡിനെയാണ് സൗദി പുറത്താക്കിയത്. സൗദിക്ക് രണ്ടുതവണ ലോകകപ്പ് യോഗ്യത നേടിക്കൊടുത്ത പരിശീലകനാണ് ഹെര്വ് റിനാര്ഡിന്. 2024 ഒടുവിലാണ് രണ്ടാം തവണ സൗദി കോച്ചായത്. ഖത്തര് ലോകകപ്പിലും റിനാര്ഡായിരുന്നു സൗദി അറേബ്യയുടെ പരിശീലകന്. അര്ജന്റീനയെ സൗദി ഗ്രൂപ്പ് മല്സരത്തില് ഒന്നിനെതിരേ രണ്ട് ഗോളുകള്ക്ക് അട്ടിമറിച്ചിരുന്നു. സൗദിക്കെതിരായ ആദ്യ മല്സരം തോറ്റെങ്കിലും വന് തിരിച്ചുവരവ് നടത്തി അര്ജന്റീന ലോകകപ്പില് മുത്തമിട്ടിരുന്നു. 2026 ലോകകപ്പില് ഗ്രൂപ്പ് എച്ചിലാണ് സൗദി. സ്പെയിന്, കേപ് വെര്ഡി, യുറഗ്വായ് എന്നിവരാണ് ഗ്രൂപ്പിലെ മറ്റ് ടീമുകള്. ജൂണ് 16ന് യുറഗ്വായ്ക്കെതിരേയാണ് സൗദി അറേബ്യയുടെ ആദ്യ മല്സരം. റിനാര്ഡിന് പകരം മുന് ഗ്രീക്ക് താരം ജോര്ജിയസ് ഡോണിസ് ടീമിന്റെ ചുമതലയേല്ക്കുമെന്നാണ് സൂചന.