സൂപര് ലീഗ് കേരള; സെമി പ്രതീക്ഷയില് കണ്ണൂര് വാരിയേഴ്സ് ഇന്ന് കാലിക്കറ്റിനെതിരേ
കണ്ണൂര് മുന്സിപ്പല് ജവഹര് സ്റ്റേഡിയത്തില് രാത്രി 7.30നാണ് മല്സരം
കണ്ണൂര്: സീസണിലെ അവസാന ഹോം മല്സരത്തിനായി കണ്ണൂര് വാരിയേഴ്സ് എഫ്സി ഇന്നിറങ്ങും. കണ്ണൂര് മുന്സിപ്പല് ജവഹര് സ്റ്റേഡിയത്തില് രാത്രി 7.30ന് നടക്കുന്ന മല്സരത്തില് കാലിക്കറ്റ് എഫ്സിയാണ് എതിരാളി. അവസാന മല്സരം സ്വന്തം ആരാധകര്ക്കു മുന്നില് പരാജയപ്പെട്ടാണ് കണ്ണൂര് വാരിയേഴ്സ് ഇറങ്ങുന്നത്. സ്വന്തം ആരാധകര്ക്കു മുന്പില് ഒരു മല്സരം പോലും കണ്ണൂരിന് ജയിക്കാന് സാധിച്ചിട്ടില്ല. നാലു മല്സരങ്ങള് കളിച്ചപ്പോള് രണ്ടു തോല്വിയും രണ്ടു സമനിലയുമാണ് കണ്ണൂരിന്റെ ഹോം സ്റ്റേഡിയത്തിലെ സമ്പാദ്യം.
സൂപര് ലീഗ് കേരളയില് സെമി ഫൈനലിന് യോഗ്യത നേടാന് കണ്ണൂരിന് ഇനിയുള്ള രണ്ടു മല്സരങ്ങളും ജയിക്കേണ്ടി വരും. കഴിഞ്ഞ മല്സരത്തില് ഫോഴ്സ കൊച്ചിക്കെതിരേ ഇറങ്ങിയ ടീമില് അടിമുടി മാറ്റങ്ങളുണ്ടാകാനാണ് സാധ്യത. പരിക്കാണ് ടീമിനെ അലട്ടുന്നത്. മധ്യനിരയില് ടീമിന്റെ കളി നിയന്ത്രിക്കുന്ന ലവ്സാംബ കഴിഞ്ഞ മല്സരത്തില് പരിക്കേറ്റ് പുറത്ത് പോയിരുന്നു. അസിയര് ഗോമസ്, ടി ഷിജിന്, ഷിബിന് സാദ് തുടങ്ങിയവര് പരിക്കു മാറി ടീമില് തിരിച്ചത്തുമെന്ന് പ്രതീക്ഷിക്കാം. കാലിക്കറ്റിനെതിരേ വിജയിക്കുകയാണെങ്കില് പോയിന്റ് പട്ടികയില് കണ്ണൂരിന് മൂന്നാം സ്ഥാനത്തെത്താം. സമനിലയില് പിരിഞ്ഞാല് നാലാമതും എത്താന് സാധിക്കും.
സൂപര് ലീഗിലെ നിലവിലെ ചാമ്പ്യന്മാരും കരുത്തരുമാണ് കാലിക്കറ്റ് എഫ്സി. ഇതിനകം തന്നെ സെമി ഫൈനലിന് ടീം യോഗ്യത നേടിക്കഴിഞ്ഞു. ഏട്ടു മല്സരങ്ങള് പൂര്ത്തിയായപ്പോള് 17 ഗോളാണ് ടീം അടിച്ചു കൂട്ടിയത്. അവസാന മല്സരത്തില് മലപ്പുറം എഫ്സിയെ ഒന്നിനെതിരേ മൂന്നു ഗോളുകള്ക്ക് തോല്പ്പിച്ചാണ് കാലിക്കറ്റ് സെമിഫൈനല് ഉറപ്പിച്ചത്. അറ്റാക്കിങില് ലീഗിലെ ടോപ് സ്കോറര് മുഹമ്മദ് അജ്സലും അസിസ്റ്റിലെ ഒന്നാമന് പ്രശാന്തും. അജ്സല് ആറു ഗോള് നേടിയപ്പോള് പ്രശാന്ത് മൂന്ന് അസിസ്റ്റും മൂന്നു ഗോളും സ്വന്തമാക്കി. മധ്യനിരയില് കളി നിയന്ത്രിക്കാന് ഫെഡറിക്കോ ബോവാസോ, കൂട്ടിന് പെരേരയും. ഗോള് പോസ്റ്റില് കഴിഞ്ഞ സീസണിലെ മികച്ച ഗോള് കീപ്പര് ഹജ്മല് സക്കീര്. നിലവില് ഏറ്റവും കൂടുതല് സേവ് നടത്തിയ കീപ്പറും ഹജ്മലാണ്. മല്സരം ടിവിയില് ഡി ഡി മലയാളത്തിലും, മൊബൈലില് sports.com ലും തല്സമയം സംപ്രേഷണം ചെയ്യും.