സൂപര് ലീഗ് കേരള; ഐഎസ്എല് താരം ഇഷാന് പണ്ഡിത മലപ്പുറം എഫ്സിയില്
സീസണില് മലപ്പുറം തട്ടകത്തിലെത്തിക്കുന്ന മലയാളിയല്ലാത്ത ഇന്ത്യന് താരമാണ് ഇഷാന് പണ്ഡിത
മലപ്പുറം: ഇന്ത്യന് താരവും മുന് കേരളാ ബ്ലാസ്റ്റേഴ്സ് മുന്നേറ്റ താരവുമായ ഇഷാന് പണ്ഡിതയെ ടീമിലെത്തിച്ച് മലപ്പുറം എഫ്സി. സൂപ്പര് ലീഗ് കേരളയിലെ ശേഷിക്കുന്ന മല്സരങ്ങളില് ടീമിന്റെ മുന്നേറ്റം കൂടുതല് ശക്തമാക്കുന്നതിനു വേണ്ടിയാണ് താരത്തെ ഇപ്പോള് എംഎഫ്സി സൈന് ചെയ്തിരിക്കുന്നത്.
ഇന്ത്യന് സൂപ്പര് ലീഗ് ക്ലബുകള്ക്കു പുറമെ സ്പാനിഷ് ലീഗിലും ഇഷാന് പന്തു തട്ടിയിട്ടുണ്ട്. 27കാരന് ഡല്ഹി സ്വദേശിയണ്. ഈ സീസണില് ഇതാദ്യമായാണ് വിദേശ താരങ്ങളെയൊഴിച്ച് മലയാളിയല്ലാത്തൊരു കളിക്കാരനെ മലപ്പുറം എഫ്സി തട്ടകത്തിലെത്തിക്കുന്നത്.
ഐഎസ്എല്ലില് എഫ്സി ഗോവ, ജംഷഡ്പൂര് എഫ്സി, കേരള ബ്ലാസ്റ്റേഴ്സ് എഫ്സി തുടങ്ങിയ ടീമുകള്ക്കായി കളത്തിലിറങ്ങിയിട്ടുണ്ട്. ഗോവക്കായി 17 മല്സരങ്ങളില് നിന്ന് നാലു ഗോളുകളും, ജംഷഡ്പൂരിനു വേണ്ടി 36 മല്സരങ്ങളില് നിന്ന് ആറു ഗോളുകളും, ബ്ലാസ്റ്റേഴ്സിനു വേണ്ടി 21 മല്സരങ്ങളില് നിന്ന് രണ്ടു ഗോളുകളും ഇഷാന് പണ്ഡിത നേടിയിട്ടുണ്ട്.
ഇന്ത്യന് ദേശീയ ടീമിനായും ഇഷാന് പണ്ഡിത ബൂട്ടണിഞ്ഞിട്ടുണ്ട്. സീനിയര് ടീമിനു വേണ്ടി എട്ടു മല്സരങ്ങളില് നിന്നും ഒരു ഗോളും നേടി. 2023ലെ എഎഫ്സി ഏഷ്യന് കപ്പ് യോഗ്യതാ മല്സരത്തില് ഹോങ്കോങ്ങിനെതിരെയാണ് ഇഷാന് തന്റെ ആദ്യ അന്താരാഷ്ട്ര ഗോള് നേടിയത്. 2023ല് ഇന്റര്കോണ്ടിനെന്റല് കപ്പ് ജേതാക്കളായ ഇന്ത്യന് ടീമിലും താരം അംഗമായിരുന്നു.
ഇഷാന് തന്റെ യൂത്ത് കരിയര് കൂടുതലും സ്പെയിനിലായിരുന്നു. അല്കോബെന്ഡാസ്, യുഡി അല്മേരിയ, സിഡി ലെഗാനസ്, ജിംനാസ്റ്റിക്സ് ടാരഗോണ, ലോര്ക്ക എഫ്സി, പോബ്ല ഡി മാഫുമെറ്റ് തുടങ്ങിയ സ്പാനിഷ് ക്ലബ്ബുകള്ക്കായും താരം പന്തു തട്ടിയിട്ടുണ്ട്. ഒരു സ്പാനിഷ് ടോപ്പ് ഡിവിഷന് ക്ലബ്ബിന്റെ യൂത്ത് ടീമിനായി കളിക്കുന്ന ആദ്യ ഇന്ത്യക്കാരന് കൂടിയാണ് ഇഷാന് പണ്ഡിത.