മസ്കത്ത്: ഒമാനിലെ വിവിധ ഗവര്ണറേറ്റുകളില് അടുത്ത മണിക്കൂറുകളില് ശക്തമായ ഇടിമിന്നലോട് കൂടിയ മഴയും കാറ്റും തുടരുമെന്ന് അധികൃതര് മുന്നറിയിപ്പ് നല്കി. ഉപഗ്രഹ ചിത്രങ്ങളില് സജീവമായ മേഘരൂപീകരണം കണ്ടെത്തിയതിനെ തുടര്ന്ന് മഴയുടെ തീവ്രത വര്ധിക്കാനുള്ള സാധ്യതയെ സൂചിപ്പിക്കുന്നതാണെന്നും അധികൃതര് വ്യക്തമാക്കി.
സെന്ട്രല് മേഖലകളിലും തെക്കുകിഴക്കന്, വടക്കുകിഴക്കന് പ്രദേശങ്ങളിലുമായി ക്യുമുലസ് മേഘങ്ങള് വ്യാപകമായി രൂപപ്പെട്ട് ദോഫാര് ഗവര്ണറേറ്റിലേക്കും നീങ്ങുന്ന സാഹചര്യമാണ് നിലവിലുള്ളത്. ഇതിന്റെ അടിസ്ഥാനത്തില് വിവിധ പ്രദേശങ്ങളില് വ്യത്യസ്ത തീവ്രതയിലുള്ള മഴയ്ക്കും ഇടിമിന്നലിനും സാധ്യതയുണ്ടെന്ന് കാലാവസ്ഥാ വകുപ്പ് വ്യക്തമാക്കി. ദാഹിറ, ബാത്തിന, വടക്കന്തെക്കന് ഷര്ഖിയ, വടക്കന് ദഖ്ലിയ തുടങ്ങിയ ഗവര്ണറേറ്റുകളില് ഇടിമിന്നലോടു കൂടിയ മഴ തുടരുമെന്ന് റഡാര് വിവരങ്ങള് സൂചിപ്പിക്കുന്നു. ചിലയിടങ്ങളില് മണിക്കൂറില് 37 മുതല് 92 കിലോമീറ്റര് വരെ വേഗതയുള്ള ശക്തമായ കാറ്റും ആലിപ്പഴ വര്ഷവും ഉണ്ടാകാന് സാധ്യതയുണ്ട്.
മഴയും കാറ്റും മൂലം കാഴ്ചപരിധി കുറയാനും വാദികള് പെട്ടെന്ന് നിറഞ്ഞൊഴുകാനും സാധ്യതയുള്ളതിനാല് പൊതുജനങ്ങള് അതീവ ജാഗ്രത പാലിക്കണമെന്ന് അധികൃതര് നിര്ദേശിച്ചു. വാദികള് മുറിച്ചുകടക്കരുതെന്നും മുന്നറിയിപ്പുണ്ട്.
വെള്ളിയാഴ്ച്ച രാത്രി മുതല് ശനിയാഴ്ച്ച രാത്രി വരെ ഒമാനിലെ വടക്കന് ബാത്തിന, അല് ബുറൈമി, അല് ദാഹിറ, തെക്കന് ബാത്തിന, അല് ദഖ്ലിയ, മസ്കത്ത്, മുസന്ദം, വടക്കന്തെക്കന് ഷര്ഖിയ മേഖലകളില് കനത്ത മഴ രേഖപ്പെടുത്തിയിരുന്നു.