ബഹ്റൈന് ഊര്ജ-പ്രകൃതി വിഭവ സുപ്രിം കൗണ്സില് യോഗം ചേര്ന്നു; സുസ്ഥിര ഊര്ജ പദ്ധതികള്ക്ക് അംഗീകാരം
മനാമ: രാജ്യത്തിന്റെ ഊര്ജ സുരക്ഷയും സുസ്ഥിര വികസനവും ലക്ഷ്യമിട്ട് ബഹ്റൈന് കിരീടാവകാശിയും പ്രധാനമന്ത്രിയുമായ പ്രിന്സ് സല്മാന് ബിന് ഹമദ് ആല് ഖലീഫയുടെ അധ്യക്ഷതയില് ഊര്ജ-പ്രകൃതി വിഭവങ്ങള്ക്കായുള്ള സുപ്രിം കൗണ്സിലിന്റെ 33ാമത് യോഗം ചേര്ന്നു. രാജ്യത്തിന്റെ ഭാവി വികസനത്തിന് നിര്ണായകമായ സുസ്ഥിര ഊര്ജ തന്ത്രങ്ങള്ക്കും നൂതന ദേശീയ വികസന പദ്ധതികള്ക്കും യോഗം അംഗീകാരം നല്കി. പരിസ്ഥിതി സൗഹൃദവും കൂടുതല് കാര്യക്ഷമവുമായ ഊര്ജ സ്രോതസ്സുകളിലേക്കുള്ള ബഹ്റൈന്റെ മാറ്റം വേഗത്തിലാക്കുന്ന നിര്ണായക തീരുമാനങ്ങളാണ് യോഗത്തില് കൈക്കൊണ്ടത്.
നൂതന സാങ്കേതികവിദ്യകളുടെ സഹായത്തോടെ പുനരുപയോഗ ഊര്ജ മേഖലയില് വലിയ മാറ്റങ്ങള് കൊണ്ടുവരാനുള്ള ബഹ്റൈന്റെ പ്രതിജ്ഞാബദ്ധത പ്രിന്സ് സല്മാന് ബിന് ഹമദ് ആല് ഖലീഫ യോഗത്തില് ഊന്നിപ്പറഞ്ഞു. പ്രകൃതി വിഭവങ്ങളുടെ ദീര്ഘകാല ആസൂത്രണവും കാര്യക്ഷമ വിനിയോഗവും ഉറപ്പാക്കുന്നതിലൂടെ രാജ്യത്തിന്റെ സാമ്പത്തിക അടിത്തറ കൂടുതല് ശക്തിപ്പെടുത്താനാകുമെന്ന് അദ്ദേഹം വ്യക്തമാക്കി.
ഹരിത ഊര്ജ പദ്ധതികള്ക്ക് മുന്ഗണന നല്കുന്നതിലൂടെ ആഗോള പരിസ്ഥിതി ലക്ഷ്യങ്ങള് കൈവരിക്കുന്നതിനൊപ്പം രാജ്യത്തിന്റെ ഊര്ജ ഉപഭോഗത്തില് വന് ലാഭം ഉണ്ടാക്കാനാണ് സര്ക്കാര് ലക്ഷ്യമിടുന്നതെന്ന് യോഗം വിലയിരുത്തി. നിലവിലുള്ള ഊര്ജ സ്രോതസ്സുകളുടെ അവസ്ഥയും വരാനിരിക്കുന്ന പുതിയ പദ്ധതികളുടെ പുരോഗതിയും വിശദമായി പരിശോധിച്ചു.
ഭാവിയിലെ ഊര്ജ ആവശ്യങ്ങള് മുന്കൂട്ടി കണക്കിലെടുത്തുള്ള അടിസ്ഥാന സൗകര്യ വികസനത്തിനും പുതിയ നിക്ഷേപങ്ങള്ക്കും യോഗം അനുമതി നല്കി. ഊര്ജ സംരക്ഷണത്തിനായുള്ള ബോധവത്കരണ പരിപാടികള്ക്കും നൂതന എനര്ജി എഫിഷ്യന്സി പദ്ധതികള്ക്കും കൂടുതല് ഊന്നല് നല്കാനും തീരുമാനമായി.
ബഹ്റൈന് വിഷന് 2030ന്റെ ഭാഗമായി നടപ്പാക്കുന്ന ഈ പദ്ധതികള് രാജ്യത്തെ ആഗോള നിലവാരത്തിലുള്ള ഊര്ജ ഹബ്ബായി മാറ്റാന് സഹായിക്കുമെന്ന് കിരീടാവകാശി പ്രത്യാശ പ്രകടിപ്പിച്ചു. സര്ക്കാര് മുന്നോട്ടുവയ്ക്കുന്ന ഈ സുപ്രധാന നടപടികള് ജനങ്ങളുടെ ജീവിതനിലവാരം ഉയര്ത്തുന്നതിനും പരിസ്ഥിതി മലിനീകരണം കുറയ്ക്കുന്നതിനും വലിയ സംഭാവന നല്കുമെന്നും അദ്ദേഹം പറഞ്ഞു. ഉന്നതതല ഉദ്യോഗസ്ഥരും സമിതി അംഗങ്ങളും യോഗത്തില് പങ്കെടുത്തു.