കോട്ടയം: കോട്ടയത്ത് യുവതിയേയും യുവാവിനേയും ലോഡ്ജ് മുറിയില് മരിച്ച നിലയില് കണ്ടെത്തി. ശാസ്ത്രി റോഡിലെ ലോഡ്ജിലാണ് വെള്ളിയാഴ്ച രാത്രി ഇവരെ തൂങ്ങി മരിച്ച നിലയില് കണ്ടെത്തിയത്. കോട്ടയം മര്യാത്തുരുത്ത് കൈതാരം ഹൗസില് ആസിയ തസനിം(19), പുതുപ്പള്ളി പനംതാനത്ത് ഹൗസില് നന്ദകുമാര്(23)എന്നിവരേയാണ് ഒരേ ഫാനില് തൂങ്ങി മരിച്ച നിലയില് കണ്ടെത്തിയത്.
വ്യാഴാഴ്ച വൈകീട്ട് അഞ്ചിനാണ് ഇരുവരും ലോഡ്ജില് മുറിയെടുത്തത്. വെള്ളിയാഴ്ച വൈകിയും ഇരുവരേയും മുറിയില്നിന്ന് പുറത്തു കാണാതെ വന്നതോടെ ജീവനക്കാര് രാത്രി എട്ടിന് കോട്ടയം വെസ്റ്റ് പോലിസില് വിവരമറിയിക്കുകയായിരുന്നു. കോട്ടയം വെസ്റ്റ് സ്റ്റേഷന് ഹൗസ് ഓഫിസര് എം ജെ അരുണിന്റെ നേതൃത്വത്തിലുള്ള പോലിസ് അഗ്നിരക്ഷാ സേനയുടെ സഹായത്തോടെ മുറി തുറന്നപ്പോഴാണ് ഇരുവരേയും ഫാനില് തൂങ്ങിയ നിലയില് കണ്ടെത്തിയത്. മൃതദേഹങ്ങള് ശനിയാഴ്ച രാവിലെ ഇന്ക്വസ്റ്റ് നടത്തിയ ശേഷം മെഡിക്കല് കോളേജ് ആശുപത്രിയിലേക്ക് മാറ്റും.
മുറിയില്നിന്ന് ആത്മഹത്യാക്കുറിപ്പ് കണ്ടെത്തിയിട്ടുണ്ട്. ഇരുവരും ഒന്നിച്ച് ജീവിക്കാന് കഴിയാത്തതിനാല് ജീവനൊടുക്കുകയാണെന്ന് ആത്മഹത്യാക്കുറിപ്പില് എഴുതിയിട്ടുണ്ടെന്ന് പോലിസ് അറിയിച്ചു. ആസിയയെ കാണാനില്ലെന്ന് വീട്ടുകാര് ഗാന്ധിനഗര് പോലിസില് പരാതി നല്കിയിരുന്നു.