വാഹന ഫിറ്റ്‌നസ് പുതുക്കല്‍; കേന്ദ്രം കുത്തനെ വര്‍ധിപ്പിച്ച ഫീസ് കുറച്ച് സംസ്ഥാന സര്‍ക്കാര്‍

തിരുവനന്തപുരം: കേന്ദ്ര സര്‍ക്കാര്‍ കുത്തനെ ഉയര്‍ത്തിയ പഴയ വാഹനങ്ങളുടെ ഫിറ്റ്നസ് നിരക്ക് കുറച്ച് സംസ്ഥാന സര്‍ക്കാര്‍. 2025ല്‍ കേന്ദ്ര സര്‍ക്കാര്‍ കുത്തനെ വര്‍ധിപ്പിച്ച ഫീസാണ് ഇപ്പോള്‍ സംസ്ഥാനം കുറവ് വരുത്തിയിരിക്കുന്നത്. 15-20 വര്‍ഷം പഴക്കമുള്ള വാഹനങ്ങളുടെ ഫിറ്റ്നസ് നിരക്കാണ് അന്‍പത് ശതമാനം കുറച്ചത്. സംസ്ഥാന സര്‍ക്കാരിന്റെ പ്രത്യേക അധികാരം ഉപയോഗിച്ചാണ് നീക്കം. വൈകാതെ തന്നെ പുതിയ നിരക്കുകള്‍ പ്രാബല്യത്തില്‍ വരുമെന്നും ഗതാഗത വകുപ്പ് മന്ത്രി വാര്‍ത്താക്കുറിപ്പിലൂടെ അറിയിച്ചു

വാഹനങ്ങളുടെ പഴക്കം അനുസരിച്ച് മൂന്ന് കാറ്റഗറിയായി തിരിച്ചാണ് ഫീസ് ഈടാക്കുന്നത്. 10 മുതല്‍ 15 വര്‍ഷം വരെ, 15 മുതല്‍ 20, 20 വര്‍ഷത്തിലധികം എന്നിങ്ങനെയാണ് തിരിച്ചിരിക്കുന്നത്. മോട്ടോര്‍ബൈക്കുകള്‍, ഓട്ടോറിക്ഷകള്‍, ലൈറ്റ് മോട്ടോര്‍ വഹിക്കിള്‍, ഇടത്തരം ഹെവി ഗുഡ്സ്, പാസഞ്ചര്‍ എന്നിങ്ങനെ എല്ലാ വാഹനങ്ങളുടെയും ഫിറ്റ്നസ് പുതുക്കുന്നതിന് അവയുടെ പഴക്കത്തെ അടിസ്ഥാനപ്പെടുത്തി പുതുതായി നിശ്ചയിക്കപ്പെട്ട നിരക്കായിരിക്കും ഈടാക്കുക.

പുതുക്കിയ ഫിറ്റ്‌നസ് ഫീസ് നിരക്കുകള്‍

മോട്ടോര്‍ സൈക്കിള്‍

15-20 വര്‍ഷം: 500

20 വര്‍ഷം കഴിഞ്ഞത്: 1,000

ഓട്ടോറിക്ഷ

15-20 വര്‍ഷം: 1,650

20 വര്‍ഷത്തിലേറെ: 3,500

കാറുകള്‍

15-20 വര്‍ഷം: 3,750

20 വര്‍ഷത്തിലേറെ: 7,500

ഇടത്തരം വാഹനങ്ങള്‍

13-15 വര്‍ഷം: 1,000

15-20 വര്‍ഷം: 5,000

20 വര്‍ഷത്തിലേറെ: 10,000

ഹെവി വാഹനങ്ങള്‍

13-15 വര്‍ഷം: 2,000

15-20 വര്‍ഷം: 6,000

20 വര്‍ഷത്തിലേറെ: 12,500