പാല: കാറും സ്കൂട്ടറുകളും കൂട്ടിയിടിച്ച് രണ്ടു സ്ത്രീകള് മരിച്ചു. പാലാ പ്രവിത്താനം അല്ലപ്പാറ പാലക്കുഴക്കുന്നേല് സുനിലിന്റെ ഭാര്യ ജോമോള് (35), മേലുകാവ് നല്ലംകുഴിയില് സന്തോഷിന്റെ ഭാര്യ ധന്യ (38) എന്നിവരാണ് മരിച്ചത്. പാലാ-തൊടുപുഴ ഹൈവേയില് മുണ്ടാങ്കല് പള്ളിക്കു സമീപം രാവിലെ ഒമ്പതരയോടെയാണ് അപകടമുണ്ടായത്. പാലായില്നിന്ന് തൊടുപുഴ ഭാഗത്തേക്ക് പോകുകയായിരുന്ന കാറാണ് സ്കൂട്ടറുകളെ ഇടിച്ചു തെറിപ്പിച്ചത്. പാലാ സെന്റ് മേരീസ് സ്കൂളില് ആറാംക്ലാസ് വിദ്യാര്ഥിയായ അന്നമോളെ സ്കൂളില് വിടാന് പോകുകയായിരുന്നു ജോമോള്. ഗുരുതരമായി പരിക്കേറ്റ അന്നമോളെ(12) ആശുപത്രിയില് പ്രവേശിപ്പിച്ചു. ധന്യ പാലായിലെ സ്വകാര്യ ബാങ്കില് ജീവനക്കാരിയാണ്. ജോലിക്കു പോകുമ്പോഴായിരുന്നു അപകടം. ധന്യയുടെ മക്കള്: ശ്രീനന്ദന്, ശ്രീഹരി.