ഇടുക്കി: മൂന്നാറില് താപനില പൂജ്യം ഡിഗ്രിയിലെത്തി. സീസണിലെ ഏറ്റവും കുറഞ്ഞ താപനിലയാണിത്. നല്ലതണ്ണി, നടയാര്, തെന്മല, കന്നിയാര് എന്നിവിടങ്ങളിലാണ് ഇന്ന് പുലര്ച്ചെ അതിശൈത്യം റിപോര്ട്ട് ചെയ്തിരിക്കുന്നത്. കഴിഞ്ഞ കുറേ ദിവസങ്ങളായി മൂന്നാറില് തണുപ്പ് കൂടി വരുന്ന സാഹചര്യമാണുള്ളത്. ഉള് പ്രദേശങ്ങളില് മൈനസ് ഡിഗ്രി രേഖപ്പെടുത്തി എന്നാണ് നാട്ടുകാര് പറയുന്നത്. ദേവികുളത്ത് വാഹനങ്ങള്ക്കു മുകളില് ഐസ് തുള്ളികള് ദൃശ്യമായി. അരുവിക്കാട് എസ്റ്റേറ്റില് ഇന്ന് ഒരു ഡിഗ്രി സെല്ഷ്യസാണ് രേഖപ്പെടുത്തിയത്. ഇന്ന് പുലര്ച്ചെ മൂന്നാര് ടൗണില് രേഖപ്പെടുത്തിയത് 1.7 ഡിഗ്രി സെല്ഷ്യസ് താപനിലയായിരുന്നു.
കഴിഞ്ഞ വര്ഷം ഡിസംബര് 23നും മൂന്നാറില് മൈനസ് രണ്ട് ഡിഗ്രിയിലേക്ക് താപനിലയെത്തിയിരുന്നു. ഡിസംബര്, ജനുവരി മാസങ്ങളിലാണ് മൂന്നാറില് കൂടുതലായി തണുപ്പ് രേഖപ്പെടുത്താറുള്ളത്. ഈ മാസം അവസാനത്തോടെ താപനില മൈനസിലെത്തുമെന്നാണ് റിപോര്ട്ടുകള് സൂചിപ്പിക്കുന്നത്. മൂന്നാര് ടോപ് സ്റ്റേഷന് റോഡില് ചെണ്ടുവര എസ്റ്റേറ്റില് കഴിഞ്ഞ ദിവസം കുറഞ്ഞ താപനില രണ്ട് ഡിഗ്രി സെല്ഷ്യസ് രേഖപ്പെടുത്തിയിരുന്നു. മാട്ടുപ്പെട്ടി ആര് ആന്ഡ് ടി ഡിവിഷനില് നാല്, ലക്ഷ്മി എസ്റ്റേറ്റില് മൂന്ന്, മൂന്നാറിലും സമീപ പ്രദേശങ്ങളിലും യഥാക്രമം നാല്, അഞ്ച് ഡിഗ്രി സെല്ഷ്യസാണ് രേഖപ്പെടുത്തിയത്. മൂന്നാറിന്റെ സമീപപ്രദേശങ്ങളായ പള്ളിവാസല്, കുഞ്ചിത്തണ്ണി, വെള്ളത്തൂവല്, ദേവികുളം എന്നിവിടങ്ങളിലും കടുത്ത തണുപ്പാണ് അനുഭവപ്പെടുന്നത്.