വിദ്യാര്ഥികളെക്കൊണ്ട് വന്ദേഭാരതില് ആര്എസ്എസ് ഗണഗീതം പാടിച്ച സംഭവം: അന്വേഷണത്തിന് ഉത്തരവിട്ട് വിദ്യാഭ്യാസമന്ത്രി
സര്ക്കാര് പരിപാടികളില് കുട്ടികളെ രാഷ്ട്രീയവത്കരിക്കുന്നതും പ്രത്യേക വിഭാഗത്തിന്റെ വര്ഗീയ അജണ്ടകള്ക്ക് ഉപയോഗിക്കുന്നതും ഭരണഘടനാ തത്വങ്ങളുടെ ലംഘനമാണെന്നും വി ശിവന്കുട്ടി
തിരുവനന്തപുരം: വന്ദേഭാരത് എക്സ്പ്രസില് സ്കൂള് വിദ്യാര്ഥികളെ കൊണ്ട് ആര്എസ്എസ് ഗണഗീതം പാടിച്ച സംഭവത്തില് വിദ്യാഭ്യാസമന്ത്രി വി ശിവന്കുട്ടി അന്വേഷണത്തിന് ഉത്തരവിട്ടു. അന്വേഷിച്ച് റിപോര്ട്ടു നല്കാന് പൊതുവിദ്യാഭ്യാസ ഡയറക്ടറോട് വി ശിവന്കുട്ടി നിര്ദേശം നല്കി. സംഭവം അതീവ ഗൗരവത്തോടെയാണ് സര്ക്കാര് കാണുന്നതെന്നും ഇതു സംബന്ധിച്ച് ഉടന് റിപോര്ട്ട് സമര്പ്പിക്കാന് പൊതുവിദ്യാഭ്യാസ ഡയറക്ടര്ക്ക് നിര്ദേശം നല്കിയതായും മന്ത്രി അറിയിച്ചു.
സര്ക്കാര് പരിപാടികളില് കുട്ടികളെ രാഷ്ട്രീയവത്കരിക്കുന്നതും പ്രത്യേക വിഭാഗത്തിന്റെ വര്ഗ്ഗീയ അജണ്ടകള്ക്ക് ഉപയോഗിക്കുന്നതും ഭരണഘടനാ തത്വങ്ങളുടെ ലംഘനമാണ്. വിദ്യാര്ഥികളെ പങ്കെടുപ്പിച്ച് ഔദ്യോഗിക ചടങ്ങ് നടത്തിയതില് വീഴ്ചയുണ്ടായിട്ടുണ്ടോയെന്നും പരിശോധിക്കുമെന്നും മന്ത്രി അറിയിച്ചു. റിപോര്ട്ടിന്റെ അടിസ്ഥാനത്തില് ആവശ്യമായ തുടര്നടപടികള് സ്വീകരിക്കും. രാജ്യത്തിന്റെ മതനിരപേക്ഷ ദേശീയത സംരക്ഷിക്കാനുള്ള ഉത്തരവാദിത്വം സര്ക്കാരിനുണ്ടെന്നും, അത് ഉറപ്പുവരുത്തുമെന്നും മന്ത്രി കൂട്ടിച്ചേര്ത്തു.
ശനിയാഴ്ച എറണാകുളം-ബെംഗളൂരു വന്ദേഭാരതിന്റെ ഉദ്ഘാടന യാത്രയില് വിദ്യാര്ഥികളെക്കൊണ്ട് ആര്എസ്എസ് ഗണഗീതം പാടിച്ചതില് പ്രതിഷേധം ശക്തമായിരുന്നു. ഭരണഘടനാതത്വങ്ങളുടെ ലംഘനമാണ് നടന്നതെന്ന് മുഖ്യമന്ത്രി പിണറായി വിജയന് ഫേസ്ബുക്കില് കുറിച്ചിരുന്നു. വര്ഗീയ പ്രചരണത്തിനു വേണ്ടി കേന്ദ്ര സര്ക്കാര് ഇന്ത്യന് റെയില്വേയെ ഉപയോഗിക്കുകയാണെന്ന് പ്രതിപക്ഷ നേതാവ് വി ഡി സതീശനും ആരോപിച്ചിരുന്നു. കുട്ടികളുടെ തലച്ചോറിലേക്ക് വിഷം കുത്തിവയ്ക്കുന്ന ആര്എസ്എസിനെയാണ് ഇന്നു കണ്ടതെന്ന് എഐസിസി ജനറല് സെക്രട്ടറി കെ സി വേണുഗോപാലും പറഞ്ഞിരുന്നു. വിദ്യാര്ഥികള് ആര്എസ്എസ് ഗണഗീതം പാടുന്ന വീഡിയോ സോഷ്യല് മീഡിയയില് പങ്കുവെച്ച ദക്ഷിണ റെയില്വേ വിവാദമായതോടെ ആദ്യം പിന്വലിച്ചെങ്കിലും പിന്നീട് രാത്രിയോടെ എക്സില് പോസ്റ്റു ചെയ്തു.