ശ്രീനന്ദയുടെ മൃതദേഹം വീട്ടിലെത്തിച്ചു, ഉച്ചയ്ക്ക് ഒരു മണി വരെ പൊതുദര്ശനം
പാലക്കാട്: കര്ണാടകയില് കുടുംബത്തോടൊപ്പമുളള യാത്രയ്ക്കിടെ കാണാതാവുകയും പിന്നീട് മരിച്ച നിലയില് കണ്ടെത്തുകയും ചെയ്ത പാലക്കാട് സ്വദേശി ശ്രീനന്ദയുടെ മൃതദേഹം വീട്ടിലെത്തിച്ചു. കടമ്പഴിപ്പുറത്തെ വീട്ടിലാണ് പൊതുദര്ശനം. ഉച്ചയ്ക്ക് ഒരു മണി വരെ പൊതുദര്ശനം നടക്കും. തിരുവില്വാമല ഐവര്മഠം ശ്മശാനത്തില് വെച്ച് ഉച്ചയ്ക് 1.30ന് മൃതദേഹം സംസ്കരിക്കും.
ചിക്കമഗളൂരുവില് കുടുംബത്തോടൊപ്പമുള്ള യാത്രയ്ക്കിടെ കാണാതായ ശ്രീനന്ദയുടെ മൃതദേഹം ഇന്നലെയാണ് കണ്ടെത്തിയത്. വ്യൂപോയിന്റിന് താഴെ 500 അടി താഴ്ചയില് നിന്നാണ് മൃതദേഹം കണ്ടെത്തിയത്.
ചൊവ്വാഴ്ച വൈകിട്ടോടെയാണ് ശ്രീനന്ദയെ കാണാതായത്. കുടുംബം അടക്കമുള്ള 40 അംഗ സംഘത്തിനൊപ്പം ചിക്കമഗളൂരുവില് എത്തിയതായിരുന്നു ശ്രീനന്ദ. മാണിക്യധാര വെള്ളച്ചാട്ടത്തിന് സമീപത്തുവെച്ചായിരുന്നു ശ്രീനന്ദയെ കാണാതാകുന്നത്.