ഗസയിലെ വംശഹത്യക്ക് സഹായം നല്കിയ സ്പാനിഷ് സ്റ്റീല് കമ്പനിക്കെതിരേ അന്വേഷണം
മാഡ്രിഡ്: ഗസയിലെ വംശഹത്യക്ക് സഹായം നല്കിയ സ്റ്റീല് കമ്പനിക്കെതിരേ സ്പെയ്ന് സുപ്രിംകോടതി അന്വേഷണം ആരംഭിച്ചു. സിദ്നോര് സ്പെഷ്യല് സ്റ്റീല്സ് എന്ന കമ്പനിക്കെതിരെയാണ് ജഡ്ജി ഫ്രാന്സിസ്കോ ഡി ജോര്ജ് അന്വേഷണം ആരംഭിച്ചത്. ഇസ്രായേലി മിലിറ്ററി ഇന്ഡസ്ട്രീസിന് രഹസ്യമായി സ്റ്റീല് നല്കിയെന്നാണ് സിദ്നോര് സ്പെഷ്യല് സ്റ്റീല്സ് ചെയര്മാന് ജോസ് അന്റോണിയോ അടക്കമുള്ള രണ്ടുപേര്ക്കെതിരെയുള്ള കേസ്. മാരകമായ ആയുധങ്ങള് നിര്മിക്കുന്ന ഇസ്രായേലിലെ എല്ബിത്ത് സിസ്റ്റത്തിന്റെ ഭാഗമാണ് ഇസ്രായേലി മിലിറ്ററി ഇന്ഡസ്ട്രീസ്. അതിനാല് തന്നെ സ്പാനിഷ് കമ്പനി നല്കിയ സ്റ്റീല് കൊണ്ടുള്ള ആയുധങ്ങള് ഗസയില് ഉപയോഗിച്ചിട്ടുണ്ടാവാമെന്നാണ് അനുമാനം.
ഗസയില് ഇസ്രായേല് വംശഹത്യ നടത്തിയെന്ന് അന്താരാഷ്ട്ര മാധ്യമ റിപോര്ട്ടുകള്, യുഎന് സ്പെഷ്യല് റപ്പോട്ടെ ഫ്രാഞ്ചെസ്ക അല്ബനീസിന്റെ റിപോര്ട്ട്, യുഎന്ആര്ഡബ്ല്യുഎ റിപോര്ട്ട്, അന്താരാഷ്ട്ര നീതിന്യായ കോടതിയുടെ റിപോര്ട്ട് എന്നിവ പറയുന്നതായും കോടതി ചൂണ്ടിക്കാട്ടി. തുര്ക്കിയിലെ തുറമുഖങ്ങള് വഴി സിദ്നോര് കമ്പനി ഇസ്രായേലി മിലിറ്ററി ഇന്ഡസ്ട്രീസിസിന് 1,207 ടണ് സ്റ്റീല് നല്കിയെന്ന് ഐറിഷ് മാധ്യമം റിപോര്ട്ട് ചെയ്തെന്നും കോടതി ചൂണ്ടിക്കാട്ടി. തുടര്ന്ന് കമ്പനി മേധാവികളോട് നവംബര് 12ന് ഹാജരാനാവും നിര്ദേശിച്ചു.